மாணவர் முரசு
இ-பேப்பர்
பேங்காக்: தாய்லாந்து, அமெரிக்காவுடனான வர்த்தகப் பேச்சு தொடரும் என்று கூறியுள்ளது. தனக்கும் கம்போடியாவுக்கும் இடையிலான எல்லைப் பூசலுக்கும் அதற்கும் தொடர்பில்லை என்று பேங்காக் சனிக்கிழமை (நவம்பர் 15) தெரிவித்தது.
அமெரிக்காவின் சமரச முயற்சியால் அண்மையில் தாய்லாந்துக்கும் கம்போடியாவுக்கும் இடையில் சண்டை நிறுத்த உடன்பாடு எட்டப்பட்டது. உடன்பாட்டுக்குத் தாய்லாந்து கடப்பாடு தெரிவிக்கும்வரை, தற்காலிகமாக வர்த்தகப் பேச்சை நிறுத்திவைப்பதாய் வாஷிங்டன் சொல்லியிருந்ததுது. அந்தத் தகவலைத் தாய்லாந்து வெளியுறவு அமைச்சின் பேச்சாளர் நிக்கோர்ன்டே பலாங்க்குன் ஏற்கெனவே கூறியிருந்தார்.
அதன் பிறகு, தாய்லாந்துப் பிரதமர் அனுட்டின் சார்ன்விராக்குனும் அமெரிக்க அதிபர் டோனல்ட் டிரம்ப்பும் வெள்ளிக்கிழமை இரவு தொலைபேசியில் உரையாடினர். தாய்லாந்து அரசாங்கத்தின் பேச்சாளர் சிரிப்போங் அங்க்காசக்குல்கியாட் அதனைத் தெரிவித்தார்.
“வர்த்தகப் பேச்சு தொடரும். அதற்கும் எல்லை விவகாரத்திற்கும் சம்பந்தமில்லை,” என்றார் சிரிப்போங். தற்போதைய இரு தரப்பு உறவுகளின்கீழ் தாய்லாந்து-கம்போடிய விவகாரத்தில் அமெரிக்கா தலையிட விரும்பவில்லை என்று திரு அனுட்டினிடம் திரு டிரம்ப் சொன்னதாகவும் பேச்சாளர் குறிப்பிட்டார்.
இரு தரப்பு வர்த்தகக் கட்டமைப்பைப் பற்றி வாஷிங்டனும் பேங்காக்கும் சென்ற மாதம் (அக்டோபர் 2025) அறிவித்தன. அதன்படி, தாய்லாந்துப் பொருள்களுக்கு அமெரிக்கா 19 தீர்வையை விதிக்கும். மற்ற சில பொருள்களுக்குத் தீர்வையை அறவே அகற்றுவது குறித்தும் அமெரிக்கா யோசித்து வருகிறது.
தாய்லாந்துக்கும் கம்போடியாவுக்கும் இடையில் இந்த வாரம் எல்லைப் பதற்றம் மீண்டும் தலைதூக்கியது. அதனைத் தொடர்ந்து அந்நாடுகளின் தலைவர்களுடன் திரு டிரம்ப் வெள்ளிக்கிழமை தனித்தனியே பேசினார். இரு தரப்புக்கும் இடையில் பிரச்சினை சரியாகிவிடும் என்று அமெரிக்க அதிபர் நம்பிக்கை தெரிவித்தார்.
சண்டை நிறுத்தத்தைத் தற்காலிகமாய்க் கைவிடுவதாகத் தாய்லாந்து இந்த வாரம் அறிவித்தது. கம்போடியா வைத்த புதிய கண்ணிவெடிகளில் தனது படைவீரர்கள் காயமுற்றதாகக் குற்றஞ்சாட்டியது தாய்லாந்து. அது மன்னிப்புக் கேட்கவேண்டும் என்கிறது பேங்காக். ஆனால் அதனை மறுக்கிறது நோம் பென்.
