மாணவர் முரசு
இ-பேப்பர்
ஜோகூர் பாரு: மலேசியாவின் நிலச் சோதனைச் சாவடிகளில் கார்களுக்கான குடிநுழைவு அனுமதிக்கான கியூஆர் (QR) குறியீடு முறையை விரிவுபடுத்துவது நெரிசலைக் குறைக்கவும் எல்லை தாண்டிய செயல்திறனை மேம்படுத்தவும் உதவும் என்று ஜோகூருக்கும் சிங்கப்பூருக்கும் இடையில் அடிக்கடி பயணம் செய்பவர்கள் கூறுகின்றனர்.
சுயதொழில் செய்து, வேலைக்காக எல்லையைத் தாண்டி வாகனம் ஓட்டிச் செல்லும் திரு ஹென்றி கோ, இந்த நடவடிக்கையை வரவேற்கிறார். இது நீண்ட காலமாக எதிர்பார்க்கப்பட்ட ஒன்று என்று கூறினார்.
“தற்போது, மோட்டார் சைக்கிள்கள் மற்றும் பேருந்துகளைப் பயன்படுத்தும் பயணிகள் மட்டுமே மலேசியச் சோதனைச் சாவடிகளில் கியூஆர் குறியீடு குடியேற்ற அனுமதியைப் பெற முடியும்.
முந்தைய ஆண்டுகளுடன் ஒப்பிடும்போது கார் தடங்களில் நெரிசல் குறைந்துள்ள நிலையில், கியூஆர் குறியீடு முறை இந்த செயலாக்கத்தை மேலும் விரைவுபடுத்த உதவும் என்று திரு கோ நம்புகிறார்.
சிங்கப்பூரின் நிலச் சோதனைச் சாவடிகள் ஏற்கனவே கார்கள், மோட்டார் சைக்கிள்கள், பேருந்துகள், லாரிகள் ஆகியவற்றுக்கு கியூஆர் குறியீடு முறையை அனுமதிக்கின்றன என்றும், மலேசியா இந்த முறையை ஏற்றுக்கொள்வது வட்டார செயல்திறனைப் பேணுவதில் ஒரு முக்கியமான படியாக அமையும் என்றும் அவர் குறிப்பிட்டார்.
“நமது நிலச் சோதனைச் சாவடிகளில் நெரிசல் பிரச்சினைகளைத் தீர்க்க முடிந்தால், அது முதலீட்டாளர்கள் மீது, குறிப்பாக ஜோகூர்-சிங்கப்பூர் சிறப்புப் பொருளியல் மண்டலத்தில் ஈடுபட்டுள்ளவர்கள் மீது நல்ல அபிப்பிராயத்தை ஏற்படுத்தும்,” என்று திரு கோ கூறினார்.
மார்ச் 3ஆம் தேதி, மலேசியத் துணைப் பிரதமர் ஃபடில்லா யூசோப், “இந்த ஆண்டு கார் பாதைகளுக்கும் கியூஆர் குறியீட்டு முறை விரிவுபடுத்தப்படும்,” என்று அறிவித்தார்.
கோலாலம்பூரில் நடைபெற்ற ஜோகூர் கடற்பாலத்தில் நெரிசலைக் குறைப்பதற்கான சிறப்புக் குழு கூட்டத்திற்குத் தலைமை தாங்கிய பிறகு, மோட்டார் சைக்கிள்கள் மற்றும் பேருந்துகளுக்கான சோதனை முயற்சி வெற்றிகரமாக நடந்தேறியதை அடுத்து, கார் பாதைகளுக்கான கியூஆர் குறியீட்டு சோதனை முறை விரைவில் தொடங்கும் என்றார் அவர்.
தொடர்புடைய செய்திகள்
தற்போது, ஒவ்வொரு மோட்டார் சைக்கிள் ஓட்டுநர் அல்லது பேருந்து பயணிக்கும் கியூஆர் குறியீடுகளைப் பயன்படுத்தி குடிநுழைவை முடிக்க மூன்று வினாடிகள் மட்டுமே ஆகிறது என்று மலேசியத் துணைப் பிரதமர் மேலும் கூறியதாக தி ஸ்டார் செய்தி குறிப்பிட்டது.