மாணவர் முரசு
இ-பேப்பர்
ஹனோய்: வியட்னாமிய அரசாங்கம், அனைத்துப் பள்ளிகளிலும் 2035ஆம் ஆண்டுக்குள் ஆங்கிலம் கட்டாய இரண்டாம் பாடமாக இருக்கும் என்று அறிவித்துள்ளது.
2030க்குள் அது முதல் வகுப்பில் கட்டாயமாக்கப்படும். புதிய திட்டத்தின்படி, அடுத்த ஐந்தாண்டில் அனைத்து மழலையர் பள்ளிகளும் பாலர் பள்ளிகளும் பிள்ளைகளுக்கு ஆங்கிலத்தை அறிமுகப்படுத்த வேண்டும்.
தற்போது ஆங்கிலம், மூன்றாம் வகுப்பிலிருந்துதான் கட்டாயப் பாடமாக இருக்கிறது. தகுதிவாய்ந்த ஆசிரியர்களையும் வசதிகளையும் கொண்ட சில பள்ளிகள் முதல் வகுப்பிலிருந்து ஆங்கிலத்தைச் சொல்லிக்கொடுக்கலாம். ஆனால் அது கட்டாயப் பாடமன்று. விருப்பத்தின்பேரில் ஆங்கிலப் பாடத்தை வாரத்திற்கு இரண்டு முறை கற்பிக்கலாம்.
பிள்ளைகளின் ஆங்கில மொழிவளத்தை மேம்படுத்துவது நோக்கம் என்று அரசாங்கம் குறிப்பிட்டது. உலக அளவில் ஒற்றுமையை வலுப்படுத்த உதவும் திறம்பட்ட தலைமுறையை உருவாக்குவதற்கு அது கைகொடுக்கும் என்று வியட்னாமிய அரசாங்கம் சென்ற மாதம் (அக்டோபர் 2025) வெளியிட்ட அறிக்கை குறிப்பிட்டது.
2045க்குள் நாடு முழுதும் ஏறக்குறைய 30 மில்லியன் மாணவர்கள் 50,000 பொதுப் பள்ளிகளில் ஆங்கிலத்தைப் பயன்படுத்துவர் என்று எதிர்பார்க்கப்படுகிறது. தற்போது வியட்னாமில் 26,000க்கும் மேற்பட்ட பள்ளிகளில் கிட்டத்தட்ட 23 மில்லியன் மாணவர்கள் பயில்கின்றனர்.
ஆங்கில மொழியைக் கற்றுக்கொள்வது மற்ற நாடுகளிலிருந்து வருவோருடன் பேசுவதற்கு உதவியாய் இருப்பதாகப் பிள்ளைகள் சிலர் கருதுகின்றனர்.
2023ஆம் ஆண்டிலிருந்து, கணிதமும் அறிவியலும் வியட்னாமிய மொழியிலும் ஆங்கிலத்திலும் நடத்தப்படுகின்றன. பள்ளிகள் அவ்வாறு செய்வதற்குப் பெற்றோர் வலுவான ஆதரவைத் தந்துள்ளனர்.
வியட்னாமில் 90 விழுக்காட்டுக்கும் மேற்பட்ட மாணவர்கள், அரசாங்க அல்லது பொதுப் பள்ளிகளில் பயில்கின்றனர். சிலர் தனியார் பள்ளிகளுக்குப் போகின்றனர்.
தொடர்புடைய செய்திகள்
வியட்னாமில் தொடக்கப்பள்ளியில் மாணவர்கள் ஐந்தாம் வகுப்புவரை பயில்வர். பின்னர் ஆறாம் வகுப்பிலிருந்து ஒன்பதாம் வகுப்புவரை படிக்க அவர்கள் நடுநிலைப் பள்ளிக்குச் செல்லவேண்டும். பத்தாம் வகுப்பிலிருந்து பன்னிரண்டாம் வகுப்பு வரையிலான கல்வியை உயர்நிலைப் பள்ளிகள் வழங்குகின்றன. அதன் பிறகு, மாணவர்கள் பல்கலைக்கழகங்களுக்குச் செல்கின்றனர்.