மாணவர் முரசு
இ-பேப்பர்
டிபிலிசி: ஜார்ஜியாவின் முன்னாள் அதிபர் மிகைல் சாகாஷ்விலிக்கு புதன்கிழமை அன்று மேலும் ஒன்பது ஆண்டுகள் சிறைத் தண்டனை விதிக்கப்பட்டதாக இன்டர்பிரைஸ் செய்தி நிறுவனம் தெரிவித்தது.
முன்னதாக மோசடி வழக்கில் அவர் குற்றவாளி எனத் தீர்ப்பளிக்கப்பட்டது.
சாகாஷ்விலி, 2004 முதல் 2013 வரை அதிபராக இருந்தார். வெளிநாட்டில் நீண்ட காலம் தங்கி இருந்த அவர் 2021ல் நாடு திரும்பினார். அதிகார துஷ்பிரயோகத்திற்காக அவருக்கு ஆறு ஆண்டுகள் சிறைத் தண்டனை விதிக்கப்பட்டது. அந்தத் தண்டனையின் பெரும்பகுதியை அவர் சிறையில் உள்ள மருத்துவமனையில் கழித்துள்ளார்.
இந்நிலையில் நிதி மோசடி வழக்கில் அவருக்கு மேலும் ஒன்பது ஆண்டுகள் சிறைத் தண்டனை விதிக்கப்பட்டது. தீர்ப்பு வாசிக்கப்பட்டபோது நீதிமன்றத்தில் கூச்சல் குழப்பம் ஏற்பட்டதை ஜார்ஜிய தொலைக்காட்சிகள் காட்டின. சாகாஷ்விலியின் ஆதரவாளர்கள் நீதிபதியை அரசாங்கத்தின் அடிமை என்று முழக்கமிட்டனர்.
சாகாஷ்விலி, 2003ஆம் ஆண்டு புரட்சி மூலம் மக்கள் மத்தியில் பெரும் வரவேற்பைப் பெற்று ஆட்சிக்கு வந்தார்.
அதிகாரத்தில் இருந்தபோது, அவர் ஜார்ஜியாவை மறுசீரமைத்து, 3.7 மில்லியன் மக்கள் வசிக்கும் நாட்டில் விரைவான முன்னேற்றங்களை வழங்கும் ஒரு பொதுத்துறை சீர்திருத்தத் திட்டத்தை மேற்கொண்டார். இருப்பினும், அவரது பதவிக்காலத்தின் பிற்பகுதியில் சர்வாதிகாரம், காவல்துறையின் அடாவடித்தனம், 2008ல் ரஷ்யாவுடனான போர் ஆகியவை இடம்பெற்று அவரது ஆட்சி முடிவுக்கு வந்தது.
