மாணவர் முரசு
இ-பேப்பர்
மக்டிபெர்க், ஜெர்மனி: கடந்த 2024ஆம் ஆண்டு, கிழக்கு ஜெர்மனியின் மக்டிபெர்க் நகரில் டிசம்பர் 20ஆம் தேதியன்று நடந்துகொண்டிருந்த கிறிஸ்துமஸ் சந்தையில் காரை வேகமாக ஓட்டி, ஆடவர் ஒருவர் மக்களை மோதிக்கொன்றார்.
கடந்த 2020ஆம் ஆண்டுமுதல் மனநல மருத்துவராகப் பணியாற்றும் சவூதி அரேபியாவைப் பூர்வீகமாகக் கொண்டவர் மீதான விசாரணை, திங்கட்கிழமை (நவம்பர் 10) தொடங்கியுள்ளது.
அந்தத் தாக்குதலில் வாடகைக்கு எடுக்கப்பட்ட ஒரு ‘பிஎம்டபிள்யு’ வகை காரைக் கொண்டு, தலேப் ஜவாட் அல் அப்துல்மொஹசன் என்ற 50 வயது மனநல மருத்துவர் சந்தையில் கூடியிருந்த மக்களை மோதித் தள்ளினார்.
அவரின் கொடூரச் செயலால் ஒன்பது வயது சிறுவனுடன் 45 முதல் 75 வயதுக்குட்பட்ட ஐந்து மாதர்கள் மாண்டனர். கொல்லப்பட்ட அந்த ஆறு நபர்களுடன் 300க்கும் மேற்பட்ட பொதுமக்கள் காயமடைந்தனர்.
குற்றவாளி, சம்பந்தப்பட்ட காரின் அருகே கைதுசெய்யப்பட்டார். இஸ்லாத்துக்கு எதிரான வலதுசாரி எண்ணங்களைக் கொண்டவர் அவர் என்று அரசாங்க வழக்கறிஞர்கள் விவரித்தனர்.
வெளிநாட்டிலிருந்து வந்த பல இஸ்லாமியர்களைக் குடிமக்களாக ஏற்றுக்கொண்ட ஜெர்மனியின் அரசியல் கொள்கையை எதிர்த்ததோடு அப்துல்மொஹசன், வெறுப்பும் ஏமாற்றமும் அடைந்தார். மேலும் கிறிஸ்துமஸ் விழாவுக்கு முன்பாக எத்தனை பேரைக் கொல்லமுடியுமோ அந்த அளவுக்குத் தாக்குதலை நடத்த அவர் திட்டமிட்டதாகவும் வழக்கறிஞர்கள் தெரிவித்தனர்.
அவர்மீது ஆறு கொலைக் குற்றச்சாட்டுகளும் 338 கொலைமுயற்சிக்கான குற்றச்சாட்டுகளும் சுமத்தப்படும். விசாரணை 2026ஆம் ஆண்டு மார்ச் மாதம் வரை தொடரும் என எதிர்பார்க்கப்படுகிறது.
நீதிமன்றத்தில் இடவசதி இல்லாததால், தற்காலிகமாக அமைக்கப்பட்டுள்ள அரங்கில் நூற்றுக்கணக்கான சாட்சிகள் வாக்குமூலம் அளிக்கவுள்ளனர். துப்பாக்கிக் குண்டுகளால் துளைக்கமுடியாத விசாரணைக் கூண்டில் நிற்கப்போகும் அப்துல்மொஹசனின் குற்றம் நிரூபிக்கப்பட்டால் அவர் ஆயுள் தண்டனையை எதிர்நோக்குவார்.
தொடர்புடைய செய்திகள்
அப்துல்மொஹசன் ஜெர்மனிக்கு சவூதி அரேபியாவிலிருந்து 2006ஆம் ஆண்டில் வந்தார். ஒரு அகதிக்கான அங்கீகாரம் அவருக்கு பத்து ஆண்டுகளுக்குப் பின் வழங்கப்பட்டது. சமூக ஊடகங்களில் வலதுசாரிக் கருத்துகளை வெளிப்படையாகப் பதிவுசெய்து வந்தவரைக் கண்காணிக்கும்படி சவூதி அரேபியா, ஜெர்மனிக்கு சில ஆண்டுகளுக்கு முன்பே எச்சரிக்கை விடுத்திருந்தது.