மாணவர் முரசு
இ-பேப்பர்
பெலெம்: பிரேசிலில் நடைபெற்று வரும் ஐநா பருவநிலை மாற்ற உச்சநிலை மாநாடு நடைபெறும் இடத்துக்குள் நுழைய அந்நாட்டைச் சேர்ந்த பழங்குடியினர் சிலர் முயற்சி செய்தனர்.
அவர்களைப் பாதுகாவலர்கள் தடுத்து நிறுத்தியதை அடுத்து, இருதரப்பினருக்கும் இடையே உச்சநிலை மாநாடு நடைபெறும் இடத்தின் வாசலில் கைகலப்பு மூண்டது.
இச்சம்பவம் செவ்வாய்க்கிழமை (நவம்பர் 11) நடைபெற்றது.
மாநாடு நடைபெறும் இடத்துக்குள் தங்களை அனுமதிக்குமாறு பழங்குடியினர் கோபமாகக் குரல் எழுப்பினர்.
நில உரிமை தொடர்பான வாசகங்களை முழக்கமிட்டு கொடிகளை அசைத்தனர்.
“எங்கள் நிலம் விற்பனைக்கல்ல,” என்று வாசகங்கள் கொண்ட பதாகைகளையும் அவர்கள் ஏந்தியிருந்தனர்.
வனப்பகுதிகளில் நடைபெற்று வரும் மேம்பாட்டுப் பணிகள் குறித்து பழங்குடியினர்களின் தலைவர்களில் ஒருவரான திரு கில்மார் கவலையும் அதிருப்தியும் தெரிவித்தார்.
“பணத்தைச் சாப்பிட முடியாது. விவசாயம் தொடர்பான வர்த்தகம், கச்சா எண்ணெய் ஆய்வுகள், சட்டவிரோதமான சுரங்கப் பணிகள், சட்டவிரோதமாக மரங்களை வெட்டுதல் ஆகியவற்றிலிருந்து எங்கள் நிலத்தை விடுவிக்க வேண்டும்,” என்று திரு கில்மார் கூறினார்.
தொடர்புடைய செய்திகள்
உச்சநிலை மாநாடு நடைபெற்றுக்கொண்டிருந்த இடத்துக்குள் நுழைவதற்காக விரைந்த பழங்குடியினரைப் பாதுகாவலர்கள் பின்னுக்குத் தள்ளி, மேசைகளைப் பயன்படுத்தி வாசலில் தடுப்புகளைப் போட்டனர்.
பாதுகாவலர் ஒருவர் காயமுற்றதாக அறியப்படுகிறது.
அவர் வலியில் தமது வயிற்றைப் பிடித்துக்கொண்டிருந்ததாகவும் சக்கரநாற்காலியில் அவர் அங்கிருந்து கொண்டு செல்லப்பட்டதாகவும் ராய்ட்டர்ஸ் செய்தியாளர்கள் கூறினர்.
இன்னொரு பாதுகாவலரின் கண்ணுக்கு மேல் வெட்டுக் காயம் ஏற்பட்டது.
தடிகள் பலவற்றைப் பாதுகாவலர்கள் பறிமுதல் செய்தனர்.
கைகலப்புக்குப் பிறகு பழங்குடியினர் அங்கிருந்து கலைந்து சென்றனர்.