எரிமலை வெடிப்பு; விமானச் சேவைகள் முடங்கியதால் 263,000 பயணிகள் தவிப்பு

ஜகார்த்தா: அனாக் கிரக்கத்தாவ் எரிமலை வெடித்துச் சிதறியதைத் தொடர்ந்து, இந்தோனீசியா தனது முக்கிய அனைத்துலக விமான நிலையம் மற்றும் பிற ஏழு விமான நிலையங்களை மூடியதுடன் நூற்றுக்கணக்கான விமானச் சேவைகளையும் ரத்து செய்துள்ளது.

விமானப் போக்குவரத்து பாதிப்புகள் திங்கட்கிழமையும் (செப்டம்பர் 7) தொடர்ந்தன.

ஜகார்த்தாவிலுள்ள அனைத்துலக விமான நிலையம் உட்பட இந்தோனீசியாவின் ஏழு விமான நிலையங்கள், உள்ளூர் நேரப்படி திங்கட்கிழமை மாலை 6 மணி (சிங்கப்பூர் நேரப்படி மாலை 7 மணி) வரை தொடர்ந்து மூடப்பட்டிருக்கும் என்று அறிவிக்கப்பட்டது.

முன்னதாக, எட்டு விமான நிலையங்கள் மூடப்பட்டிருந்தன. சாம்பல் காரணமாக மூடப்பட்டிருந்த தெற்கு சுமத்ராவில் உள்ள அத்துங் பங்சு விமான நிலையம், திங்கட்கிழமை காலை 9 மணியளவில் மீண்டும் இயங்கத் தொடங்கியதாக போக்குவரத்து அமைச்சு தெரிவித்தது.

ஜகார்த்தாவில் உள்ள பள்ளிக்கூடங்களும் பாதிக்கப்பட்டுள்ளன. திங்கட்கிழமை முதல் வகுப்புகள் இணையம் வழியாக நடத்தப்படும் என்று ஜகார்த்தா நகர நிர்வாகம் அறிவித்தது.

திங்கட்கிழமை காலை 9 மணி நிலவரப்படி ஏறத்தாழ 2,300 விமானச் சேவைகளும் 263,000 பயணிகளும் பாதிக்கப்பட்டதாக இந்தோனீசியப் போக்குவரத்து அமைச்சர் டூடி புர்வாகாந்தி கூறினார்.

முந்தைய நாளான ஞாயிற்றுக்கிழமை 1,700 விமானச் சேவைகள் பாதிக்கப்பட்டதால் ஏறத்தாழ 170,000 பயணிகள் அவதியுற்றனர்.

விமானச் சேவைகள் மீண்டும் தொடங்கும்போது ஏற்படக்கூடிய பயணிகளின் பெருந்திரளைச் சமாளிக்க அதிகாரிகள் தயாராகி வருகின்றனர். சிங்கப்பூர் போன்ற வெளிநாடுகளில் உள்ள விமான நிலையங்களில் சிக்கித் தவிக்கும் பயணிகளும் பயணத்தைத் தொடரக் காத்திருக்கின்றனர்.

இவையும் உங்களுக்குப் பிடிக்கலாம்

அனைத்துவகைச் செய்திகளும் ஒரே இடத்தில்.

பிரியங்கா காந்தியின் மகன் ரேஹான் வதேராவின் கண்காட்சியில் சர்ச்சை

22 Oct 2026 - 10:23 PM

புன்னகை பூக்கும் தொண்டு: வெளிநாட்டு ஊழியர்கள் வாழ்வில் ஒளியேற்றும் நல்லுள்ளங்கள்

24 Oct 2026 - 5:30 AM

2030க்குள் சிங்கப்பூருக்கு மேலும் 3,000 தொண்டூழியர்கள் தேவை

23 Oct 2026 - 8:57 PM

வீவக மறுவிற்பனை வீட்டு விலை 0.1% சரிவு; விற்பனை அதிகரிப்பு

23 Oct 2026 - 2:55 PM

நெரிசலைக் குறைக்க உதவும் வகையில், கெர்ட்டாஜாட்டி, செமராங், சுரபாயா, யோக்யகார்த்தா, சோலோ போன்ற மாற்று விமான நிலையங்களைப் பயன்படுத்துமாறு விமான நிறுவனங்கள் ஊக்குவிக்கப்படுவதாக திரு டூடி கூறினார்.

அந்த விமான நிலையங்களுக்குச் செல்லும் பயணிகளுக்கு பேருந்துகள், ரயில்கள் போன்ற இலவச தரைவழிப் போக்குவரத்து வசதிகள் வழங்கப்படும் என்றார் அவர்.

“மாறிவரும் வானிலை காரணமாக நிலைமை எப்போது முடிவுக்கு வரும் என்பதை எங்களால் உறுதியாகக் கூற முடியாது,” என்று அவர் திங்கட்கிழமை (செப்டம்பர் 7) காலை தமது அறிக்கையில் தெரிவித்தார்.

விமானச் சேவைகள் நிறுத்தி வைக்கப்படும் நடவடிக்கை தொடக்கத்தில், ஜகார்த்தா நேரப்படி ஞாயிற்றுக்கிழமை காலை 5.30 மணி (சிங்கப்பூர் நேரப்படி காலை 6.30 மணி) வரை அமலில் இருந்தது. எனினும், அது பலமுறை நீட்டிக்கப்பட்டது.

அன்றைய தினம் அதிகாலை 1.30 மணி முதல் பிற்பகல் 1.30 மணி வரையிலான தரவுகளின்படி, மொத்தம் 301 விமானச் சேவைகள் பாதிக்கப்பட்டன. சில சேவைகள் ரத்து செய்யப்பட்ட நிலையில், மேலும் பல விமானங்கள் வேறு விமான நிலையங்களுக்குத் திருப்பிவிடப்பட்டன.

சனிக்கிழமை (செப்டம்பர் 5) அனாக் கிரக்கத்தாவ் எரிமலை வெடித்தபோது, ​​எரிமலைக் குழம்பு பீய்ச்சி அடிக்கப்பட்டது. அப்போது, பல நூறு கிலோமீட்டர் தூரம் வரை கேட்கக்கூடிய வகையிலான பெரும் சத்தம் எழுந்ததாகப் புவியியல் ஆய்வு நிறுவனம் ஒன்று தனது அறிக்கையில் குறிப்பிட்டிருந்தது.