புதிய விமானங்கள் மூலம் தனது தற்காப்புத் திறன்களை வலுப்படுத்தும் இந்தோனீசியா

ஜகார்த்தா: பிரான்சில் தயாரிக்கப்பட்ட ஆறு ரஃபேல் ரக விமானங்கள் உள்ளிட்ட உபகரணங்களை ராணுவத்திடம் ஒப்படைத்த நிலையில், இந்தோனீசியா தனது பாதுகாப்புத் திறன்களைத் தொடர்ந்து மேம்படுத்தும் என்று இந்தோனீசிய அதிபர் பிரபோவோ சுபியாந்தோ திங்கட்கிழமையன்று (மே 18) தெரிவித்தார்.

ஜகார்த்தாவில் உள்ள ஒரு ராணுவ விமானத் தளத்தில் நடைபெற்ற ஒப்படைப்பு விழாவிற்கு திரு பிரபோவோ தலைமை தாங்கினார். அங்கு அவர், அண்மையில் வாங்கப்பட்ட நான்கு டசால்ட் ஃபால்கன் 8x மற்றும் ஒரு ஏர்பஸ் A400M அட்லஸ் விமானம் உள்ளிட்ட பாதுகாப்பு உபகரணங்களை ஆய்வு செய்தார் என அதிபர் மாளிகை அறிக்கை தெரிவிக்கிறது.

அப்போதைய தற்காப்பு அமைச்சர் பிரபோவோவின் கீழ், பிரான்சில் தயாரிக்கப்பட்ட 42 ரஃபேல் ரக போர் விமானங்களை வாங்குவதற்காக ஜகார்த்தா 2022ல், 8.1 பில்லியன் அமெரிக்க டாலர் (10.4 பில்லியன் சிங்கப்பூர் டாலர்) மதிப்பிலான ஒப்பந்தத்தில் கையெழுத்திட்டது.

மே 18ஆம் தேதி நடைபெற்ற விழாவிற்குப் பிறகு பேசிய திரு பிரபோவோ, இந்தோனீசியா தனது தற்காப்புத் திறன்களைத் தொடர்ந்து வலுப்படுத்தும் என்று கூறினார்.

“ஒரு தடுப்பாகச் செயல்படுவதற்கு, நமது தற்காப்புத் திறன்களை நாம் தொடர்ந்து மேம்படுத்த வேண்டும். நமது சொந்தப் பிரதேசத்தைப் பாதுகாப்பதைத் தவிர வேறு எந்த நலன்களும் எங்களுக்கு இல்லை,” என்று அவர் செய்தியாளர்களிடம் கூறினார்.

“உலகளாவிய புவிசார் அரசியல் சூழல் நிச்சயமற்ற தன்மையால் நிறைந்துள்ளது என்பதை நாங்கள் காண்கிறோம். மேலும் நிலைத்தன்மைக்கு தற்காப்பு ஒரு முதன்மையான முன்நிபந்தனை என்பதை நாங்கள் உணர்கிறோம்.

“இந்தோனீசியா, ஜனவரியில் மூன்று ரஃபேல் ஜெட் விமானங்களின் முதல் தொகுதியைப் பெற்றது. மேலும் மே 18ஆம் தேதியன்று நடைபெற்ற விழாவில் ராணுவத்திற்காக கூடுதலாக மூன்று ஜெட் விமானங்கள் வழங்கப்பட்டன,” என்று தற்காப்பு அமைச்சின் செய்தித் தொடர்பாளர் ரிகோ ரிக்கார்டோ சிராட் ஏஎஃப்பியிடம் தெரிவித்தார்.