மாணவர் முரசு
இ-பேப்பர்
அலோஸ்டார்: கடந்த சனிக்கிழமை (நவம்பர் 8) லங்காவித் தீவின் அருகில் ரோஹிங்யா அகதிகள் என்று நம்பப்படும் ஏறத்தாழ 70 பயணிகளுடன் மூழ்கிய படகு விபத்தில் மரணமடைந்தோர் எண்ணிக்கை 20 ஆக அதிகரித்துள்ளது.
மலேசிய-தாய்லாந்து கடல் எல்லைப் பகுதியில் நடந்த விபத்தில் இதுவரையில் 14 பேர் காப்பாற்றப்பட்டுள்ளனர் என்று கெடா மற்றும் பெர்லிஸ் மாநிலங்களின் மலேசிய கடல்சார் அமலாக்க முகவையின் (MMEA) அதிகாரி ரொம்லி முஸ்தபா செவ்வாய்க்கிழமை (நவம்பர் 11) இதன் விவரங்களை உறுதிப்படுத்தினார்.
கடல் அலைகளும் வானிலை நிலவரமும் இணைந்து மூழ்கியோர் உயிருடனோ, சடலமாகவோ கரையோரமாக ஒதுங்க வாய்ப்புகள் உள்ளதால், பல அமைப்புகளும் இணைந்து மீட்புப் பணிகளில் தொடர்ந்து ஈடுபட்டுவருகின்றன.
இதுவரை காப்பாற்றப்பட்டோரில் 12 ஆண்களும் இரண்டு பெண்களும் அடங்குவர். உயிரிழந்த 20 பேரில் ஏழு ஆடவர்கள், ஒன்பது மாதர்கள், இரண்டு சிறுவன்கள், இரண்டு பெண் குழந்தைகள் ஆகியோர் அடங்குவர் என்று தெரிவிக்கப்பட்டுள்ளது.
பொதுமக்கள், விபத்தில் பாதிக்கப்பட்டோரைக் கடலோரங்களில் காண நேரிட்டால், மலேசிய கடல்சார் அமலாக்க முகவையைத் தொடர்புகொள்ளும்படி தலைமை அதிகாரி ரொம்லி முஸ்தபா கேட்டுக்கொண்டார்.
