மாணவர் முரசு
இ-பேப்பர்
கோலாலம்பூர்: மலேசியா எல்லைப் பாதுகாப்பில் மாற்றங்களைச் செய்யவுள்ளதாக அறிவித்துள்ளதை அடுத்து, சிங்கப்பூரிலிருந்து தரை வழியாக ஜோகூர் செல்லும் பயணிகள் பயணத் தாமதத்தை எதிர்நோக்கலாம்.
ஈரான் போர் உள்ளிட்ட உலகளாவிய பாதுகாப்புச் சூழலைக் கருத்தில் கொண்டு, பிப்ரவரி 28 முதல் சிங்கப்பூரின் குடிநுழைவு சோதனைச் சாவடிகள் ஆணையம் (ICA) அனைத்து எல்லைகளிலும் பயணிகள், சரக்குகள் வாகனங்களுக்கான சோதனைகளைத் தீவிரப்படுத்தியுள்ளது.
அதற்கேற்ப மலேசியாவும் தனது பாதுகாப்புகளைக் கடுமையாக்கியுள்ளது.
எல்லையில் நெரிசல், மாற்றங்கள்
“சிங்கப்பூரின் முடிவை நாங்கள் மதிக்கிறோம், அதற்கேற்ப மலேசியத் தரப்பிலும் பாதுகாப்பு மாற்றங்களைச் செய்வோம்,” என்று மலேசிய எல்லைக் கட்டுப்பாடு, பாதுகாப்பு முகமையின் இயக்குநர் ஜெனரல் முகமட் ஷுஹைலி முகமட் ஜைன் புதன்கிழமை (ஏப்ரல் 1) தெரிவித்தார்.
பயணிகளுக்கான ஆலோசனை
நெரிசலைத் தவிர்க்கவும், வேலைக்குச் செல்லும் மலேசியர்கள் தங்களது பயணத்தைச் சீராகத் திட்டமிடவும் அறிவுறுத்தப்பட்டுள்ளனர்.
ஏற்கெனவே சமூக ஊடகங்களில் ஜோகூர் பாரு - சிங்கப்பூர் கடற்பாலம் பகுதியில் நிலவும் கடும் போக்குவரத்து நெரிசல் குறித்த புகார்கள் எழுந்து வரும் நிலையில், இரு நாட்டு அதிகாரிகளும் பொதுமக்களைப் பொறுமை காக்குமாறு கேட்டுக்கொண்டுள்ளனர்.
வருங்காலத் திட்டங்கள்
நெரிசலைக் குறைக்க உட்லண்ட்ஸ் சோதனைச் சாவடியை விரிவுபடுத்துதல், ஜோகூர்-சிங்கப்பூர் விரைவுப் போக்குவரத்து போன்ற திட்டங்கள் செயல்படுத்தப்பட்டு வருகின்றன.
ஆர்டிஎஸ் ரயில் சேவை இந்த ஆண்டு இறுதிக்குள் தொடங்கும் என்று எதிர்பார்க்கப்படுகிறது.
தொடர்புடைய செய்திகள்
சிங்கப்பூர் வந்த ஜோகூர் முதல்வர்
தேசியப் பாதுகாப்பு ஒருங்கிணைப்பு அமைச்சரும் உள்துறை அமைச்சருமான கா. சண்முகத்தின் அழைப்பை ஏற்று உட்லண்ட்ஸ் சோதனைச் சாவடியின் செயல்பாடுகளை புதன்கிழமை (ஏப்ரல் 1) ஜோகூர் மாநில முதல்வர் ஓன் ஹஃபிஸ் காஸி நேரில் பார்வையிட்டார்.
“கியூஆர் குறியீடு அடிப்படையிலான குடிநுழைவு அனுமதி முறை, முக அடையாளத் தொழில்நுட்பம் ஆகியவை குறித்து எனக்கு விளக்கப்பட்டது. இவை எல்லைப் பாதுகாப்பை வலுப்படுத்துவதுடன், வாகனப் போக்குவரத்தையும் விரைவுபடுத்தும்,” என்று திரு ஹஃபிஸ் காஸி தமது ஃபேஸ்புக் பதிவில் குறிப்பிட்டுள்ளார்.