மாணவர் முரசு
இ-பேப்பர்
ஜோகூர் பாரு: மலேசியாவில் நடைபெறவிருக்கும் தேசியத் தேர்தல்களுக்கு ஒரு முக்கிய முன்னோடியாகக் கருதப்படும் ஜோகூரின் 16வது மாநிலத் தேர்தலில், ஜூலை 11ஆம் தேதியன்று வாக்குப்பதிவு நடைபெறுகிறது.
மலேசியாவின் தெற்கு மாநிலமான ஜோகூரின் சட்டமன்றத்தில் 56 இடங்களுக்குப் போட்டி நடைபெற உள்ளது. சிங்கப்பூரில் வசிப்பவர்கள் மற்றும் பணிபுரிபவர்கள் உட்பட, ஜோகூர் தொகுதியில் 2.7 மில்லியன் தகுதிபெற்ற வாக்காளர்கள் உள்ளனர்.
ஜூன் 19ஆம் தேதிக்குள் அஞ்சல் வாக்குக்கு விண்ணப்பிக்காத, சிங்கப்பூரில் உள்ள ஜோகூர்வாசிகள், தங்கள் வாக்குச் சாவடிகளுக்குச் சென்று நேரடியாக வாக்களிக்க வேண்டும் என தேர்தல் ஆணையத்தின் செய்தித் தொடர்பாளர் உறுதிப்படுத்தினார்.
ஜூலை 11ஆம் தேதி, போக்குவரத்து அல்லது சோதனைச்சாவடிகளில் எந்த இடையூறும் ஏற்படாமல் இருப்பதை உறுதிசெய்வதே முன்னுரிமை என்று மலேசிய உள்துறை அமைச்சர் சைஃபுதீன் நசுத்தியோன் இஸ்மாயில், சனிக்கிழமை (ஜூன் 27) செய்தியாளர்களிடம் கூறினார்.
சோதனைச்சாவடிகளில் அமைப்பு ரீதியான கோளாறு ஏற்பட்டு நெரிசல் ஏற்பட்டால், அதற்குத் தயாராக இருக்குமாறு தனது அமைச்சுக்கும் மலேசியக் குடிநுழைவுத் துறைக்கும் அறிவுறுத்தப்பட்டுள்ளதாக அவர் கூறினார். அந்த வார இறுதியில் திரும்பத் திட்டமிட்டுள்ள, சிங்கப்பூரில் பணிபுரியும் ஜோகூர்வாசிகளுக்கு ஏற்படக்கூடிய சிரமங்களையும் அவர் ஒப்புக்கொண்டார்.
“ஜூலை 11ஆம் தேதி சிக்கல்களைத் தவிர்ப்பதற்காக நாங்கள் அனைத்துப் பாதுகாப்பு நடவடிக்கைகளையும் மேற்கொண்டு வருகிறோம். ஆனால், நாங்கள் எந்தவிதமான இடர்பாடுகளையும் சந்திக்க விரும்பவில்லை. எங்களிடம் திட்டம் ‘ஏ’, திட்டம் ‘பி’ தயாராக உள்ளன. இதுதான் நான் அமைச்சுக்கு வழங்கியுள்ள உத்தரவு,” என்று அவர் கூறினார்.
வாக்குப்பதிவு நாள் சனிக்கிழமையன்று வருவதால், சிங்கப்பூரிலிருந்து ஜோகூருக்கான போக்குவரத்து நெரிசல் அதிகமாக இருக்கும் என எதிர்பார்க்கப்படுகிறது.
விரைவான எல்லைக் கடப்பை எளிதாக்குவதற்காக, சிறப்புப் பாதைகள் அமைப்பதற்கான சாத்தியக்கூறுகள் உட்பட, நடவடிக்கைகளைச் செயல்படுத்த எல்லைக் கட்டுப்பாடு மற்றும் பாதுகாப்பு அமைப்பு தனது விருப்புரிமையைப் பயன்படுத்தும் என்று சைஃபுதீன் வாக்காளர்களுக்கு உறுதியளித்தார்.
பயணிகள் ஜோகூர் கடற்பாலம் மற்றும் இரண்டாம் இணைப்புப் பாதைச் சாலைகளில் உள்ள போக்குவரத்தை jalanow.com, OneMotoring இணையத்தளம் அல்லது Checkpoint.sg கைப்பேசிச் செயலி மூலம் கண்காணிக்கலாம் என்று தெரிவிக்கப்பட்டுள்ளது.
