மாணவர் முரசு
இ-பேப்பர்
கோலாலம்பூர்: மலேசியாவின் நெகிரி செம்பிலான் மாநிலத்தில் பல மாதங்களாக நீடித்து வரும் அரண்மனை நெருக்கடியானது, அரியணைக்கு உரிமை கோரும் இருவருக்கும் இடையே ஒரு கட்டுப்பாடற்ற போராக உருவெடுத்துள்ளது. இதில், தற்போதைய ஆட்சியாளர் தமக்கு விசுவாசமான இரண்டு புதிய வட்டாரத் தலைவர்களை நியமிக்க உள்ளார்.
நெகிரி செம்பிலான் ஆட்சியாளர் முஹ்ரிஸ் முனாவீர், தமது உறவினரான நட்ஸருதீன் ஜாஃபரின் சவாலை எதிர்கொள்ளும் வகையில், வியாழக்கிழமை (ஜூன் 25) புதிய வட்டாரத் தலைவர்களுக்குப் பதவிப் பிரமாணம் செய்து வைப்பார் என எதிர்பார்க்கப்பட்டது.
நெகிரி செம்பிலானின் ஆட்சியாளர் முஹ்ரிஸ் நீடிக்க வேண்டும் என்று தலைமைச் சட்ட அதிகாரி அறிவுறுத்திய போதிலும், மலேசியாவின் பிற மாநிலங்களைச் சேர்ந்த அவரது சக அரச குடும்பத்தினர் அவரது சட்டபூர்வத்தன்மையை உறுதிப்படுத்த மறுத்ததைத் தொடர்ந்து இந்த நடவடிக்கை எடுக்கப்பட்டுள்ளது.
ஜூன் 23 முதல் 25ஆம் தேதி வரை நடைபெறவிருந்த ஆட்சியாளர்கள் மாநாட்டை அரச குடும்பத்தினர் ரத்து செய்தனர். இந்த மாநாட்டிற்கு முஹ்ரிஸ் தலைமை தாங்குவதாக இருந்தது.
‘உண்டாங்’ என்று அழைக்கப்படும் புதிய வட்டாரத் தலைவர்களைப் பதவியேற்கச் செய்யும் விழாக்கள், முஹ்ரிசின் போட்டியாளரான நட்ஸருதீன், ஜூன் 26ஆம் தேதி நெகிரி செம்பிலானில் உள்ள ரெம்பாவ் வட்டாரத்தில் உள்ளூர் பழங்குடித் தலைவர்களைச் சந்திக்கச் செல்வதற்கு முன்னதாக நடைபெறுகின்றன.
இது, அவரை மாநிலத்தின் இறையாண்மை கொண்டவராக நிலைநிறுத்தும் தொடர்ச்சியான பொதுத் தோற்றங்களில் ஒன்றாகும்.
இந்தக் கசப்பான அரச குடும்பப் பூசல், ஏப்ரல் 19ஆம் தேதி தலைப்புச் செய்திகளில் இடம்பிடித்தது.
அப்போது, நான்கு வட்டாரத் தலைவர்கள் முஹ்ரிசைப் பதவியிலிருந்து நீக்கிவிட்டு, முந்தைய ஆட்சியாளரின் மகனான நட்ஸருதீனை அவருக்குப் பதிலாக நியமித்ததாகக் கூறினர்.
பின்னர், ஜூன் 5ஆம் தேதி அண்டை மாநிலமான மலாக்காவிலுள்ள ஒரு ஹோட்டலில் திடீரென ஏற்பாடு செய்யப்பட்ட விழாவில் அவர்கள் நட்ஸருதீனைப் பதவியேற்கச் செய்தனர்.
இந்தச் சூழ்நிலையில், இரண்டு புதிய வட்டாரத் தலைவர்களை விரைவாகப் பதவியில் அமர்த்தும் முஹ்ரிசின் திட்டமானது, அவரது சக ஆட்சியாளர்கள் விரும்பும் ஒரு குழப்பமான அரசவைப் போரைத் தவிர்ப்பதற்கான ஒரு முயற்சியாகவும் இருக்கலாம் என்றும் கருதப்படுகிறது.
