மலேசியாவில் அதிரடிச் சோதனை; தோட்டாக்கள், விமானப் பாகங்கள் கண்டெடுப்பு

ஜோகூர் பாரு: மின்னணுக் கழிவுகள் சட்டவிரோதமாக மறுசுழற்சி செய்யப்படுவதைத் தடுக்க மலேசியாவின் பினாங்கு, பேராக், ஜோகூர் ஆகிய மாநிலங்களில் பேரளவிலான அதிரடிச் சோதனைகள் நடத்தப்பட்டன.

அதிரடிச் சோதனைகளின்போது மின்னணுக் கழிவுகள், இயந்திரங்கள் ஆகியவற்றுடன் தோட்டாக்களும் விமானப் பாகங்களும் கண்டெடுக்கப்பட்டன.

அவை அனைத்தையும் அதிகாரிகள் பறிமுதல் செய்தனர்.

ஜோகூர் மாநிலத்தின் கோத்தா திங்கி நகரில் இருந்த சட்டவிரோத உலோகப் பட்டறையில் அதிகாரிகள் 46,000 கிலோவுக்கும் அதிகமான மின்னணுக் கழிவுகளையும் விமானப் பாகங்களையும் தோட்டாக்களையும் கண்டெடுத்தனர்.

ஜாலான் லொம்போங்கில் உள்ள தொழிற்பேட்டையில் வெள்ளிக்கிழமை (மார்ச் 7) நடத்தப்பட்ட அதிரடிச் சோதனையில் வெளிநாடுகளைச் சேர்ந்த மூன்று சந்தேகநபர்கள் கைது செய்யப்பட்டதாக கோத்தா திங்கி காவல்துறைத் தலைவர் யூசோஃப் ஓத்மான் தெரிவித்தார்.

கைதானவர்களின் சீன நாட்டவர் ஒருவரும் மியன்மாரைச் சேர்ந்த தம்பதியரும் அடங்குவர்.

பறிமுதல் செய்யப்பட்ட பொருள்களில் 46,214 கிலோ மின்னணுப் பொருள்கள், 103,983 கிலோ சுருக்கப்பட்ட மின்னணுப் பாகங்கள் ஆகியவை அடங்கும்.

பறிமுதல் செய்யப்பட்ட பொருள்களின் மொத்த மதிப்பு ஏறத்தாழ 23.8 மில்லியன் ரிங்கிட் (S$7.2 மில்லியன்).

தொடர்புடைய செய்திகள்

கல்லூரி மாணவர்கள் தங்கியிருந்த அறைகளில் காவல்துறை சோதனை

அந்த ஆலையில் உள்ள பொருள்களை அலசி ஆராய்ந்து அவற்றின் எடையை உறுதி செய்ய அதிகாரிகளுக்கு 12 மணி நேரத்துக்கும் அதிகமான நேரம் எடுத்ததாக திரு யூசோஃப் கூறினார்.

அந்த ஆலை, உரிமங்கள் ஏதும் இல்லாமல் நான்கு மாதங்களாக சட்டவிரோதமான முறையில் இயங்கிக்கொண்டிருந்ததை அவர் சுட்டினார்.

“ஆலையை இயக்கிய கும்பலால் பொதுமக்களின் பாதுகாப்புக்கு ஆபத்து ஏற்படக்கூடும். அதுமட்டுமல்லாது, மின் கழிவுகளை ஒழுங்கான முறையில் அகற்றாமல் சுற்றுப்புறத்துக்கு அது கேடு விளைவிக்கக்கூடியதாக இருந்தது.

“ஆலையில் தோட்டாக்களைக் கண்டெடுத்தோம். இது மிகவும் அக்கறைக்குரியது. தவறானவர்களிடம் அவை சென்றடைந்தால் அவை குற்றச் செயல்களுக்குப் பயன்படுத்தக்கூடும்,” என்று சனிக்கிழமை (மார்ச் 8) நடைபெற்ற செய்தியாளர் கூட்டத்தில் திரு யூசோஃப் கூறினார்.

சந்தேக நபர்கள் மார்ச் 11ஆம் தேதி வரை விசாரணைக் காவலில் வைப்பட்டுள்ளனர்.

அவர்களிடம் விசாரணை நடத்தப்படுகிறது.

இதற்கிடையே, பினாங்கில் உள்ள சிம்பாங் அம்பாட்டில் உரிமம் இல்லாமல் மின் கழிவு மறுசுழற்சி ஆலையை இயக்கிய குற்றத்துக்காக மூவர் கைது செய்யப்பட்டனர்.

அவர்களில் இருவர் மியன்மாரைச் சேர்ந்தவர்கள்.

60.5 மில்லியன் ரிங்கிட் பெறுமானமுள்ள மின் கழிவுகளும் 106.7 மில்லியன் ரிங்கிட் மதிக்கத்தக்க இதர பொருள்களும் பறிமுதல் செய்யப்பட்டன.

பேராக்கில் உள்ள நெகிழிப் பொருள்கள் உற்பத்தி ஆலையில் அதிரடிச் சோதனை நடத்தப்பட்டது.

இதில் 19 வெளிநாட்டினர் கைது செய்யப்பட்டனர்.

$10.7 மில்லியன் ரிங்கிட் மதிக்கத்தக்க பொருள்கள் பறிமுதல் செய்யப்பட்டன.