பிள்ளைகளை விளையாட்டாக அச்சுறுத்திய காவல் அதிகாரி: பரவும் காணொளி

கோலாலம்பூர்: துணைக் காவல் அதிகாரிகள், இரண்டு பிள்ளைகளிடம் ‘கோபித்துக்கொள்வதைக்’ காட்டும் காணொளியொன்று இணையத்தில் பரவி வருகிறது. பிள்ளை வளர்க்கும் உத்தியில் அது வழக்கத்திற்கு மாறானது என்று இணையவாசிகள் சிலர் நகைச்சுவையாகக் குறிப்பிட்டிருந்தனர்.

காணொளி 28 விநாடி நீடிக்கிறது. டிக்டாக்கில் @கு‌ஷாநல்லையா என்பவர் ஞாயிற்றுக்கிழமை (நவம்பர் 16) அதனைப் பதிவிட்டார். டிக்டாக் காணொளியொன்றில், துணைக் காவல் அதிகாரிகள் சிறுமியிடமும் சிறுவனிடமும் பேசும் காட்சி இடம்பெற்றுள்ளது. அதில் இருக்கும் இன்னொருவர் பிள்ளைகளின் தந்தை என்று கூறப்பட்டது. அவர்கள் இருக்கும் இடம் மலேசியாவின் பினாங்கு நகரம் போல் தோன்றுவதாகவும் தெரிவிக்கப்பட்டது.

அதிகாரிகளில் ஒருவர் சிறுவனிடம் பொய்யான கோபத்துடன் பேசுகிறார். பின்னர் சிறுவனின் குடும்பத்தினர் அருகில் அவர் போகிறார். அச்சமுற்ற சிறுவன், அப்பா என்று கூறப்படுபவரை நெருங்கிச் செல்கிறான்.

சேட்டை செய்தால், பிடித்துச் சென்றுவிடுவோம் என்று அதிகாரிகளில் ஒருவர் சொன்னதாகத் தெரிகிறது.

காணொளி உரையாடலைக் கேட்காமல் இருக்கும்வகையில் ஹிப்ஹாப் இசைக் கலைஞர் கிரீப்பாவின் ‘ஓ நோ’ எனும் பாடல் இடம்பெறுகிறது. காணொளி இதுவரை 6,300க்கும் மேற்பட்ட விருப்பங்களையும் 100 கருத்துகளையும் 320 பகிர்வுகளையும் பெற்றுள்ளது.

அதிகாரிகளின் செயலைப் பலர் பாராட்டினர்.

பிள்ளைகளின் அம்மா என்று அறியப்படும் திருவாட்டி கு‌ஷாநல்லையா, சிறுவர்கள் சேட்டை செய்ததால் அவர்களை விளையாட்டுக்குக் கொஞ்சம் அச்சுறுத்துமாறு காவல் அதிகாரிகளைக் கேட்டுக்கொண்டதாகக் கூறினார். அதிகாரிகள் ஒருபோதும் கடுமையாக நடந்துகொள்ளவில்லை என்றும் பிள்ளைகள் கொஞ்சம் பயந்தனர் என்றும் அது வேடிக்கையான சம்பவம் என்றும் அவர் குறிப்பிட்டார்.