மாணவர் முரசு
இ-பேப்பர்
வாஷிங்டன்: சவூதி அரேபியப் பட்டத்து இளவரசர் முகமது சல்மான் அமெரிக்காவுக்கு அதிகாரத்துவப் பயணம் மேற்கொண்டுள்ளார்.
வெள்ளை மாளிகையின் ஓவல் அலுவலகத்தில் சவூதி இளவரசரும் அமெரிக்க அதிபர் டோனல்ட் டிரம்ப்பும் செய்தியாளர் சந்திப்பு ஒன்றை செவ்வாய்க்கிழமையன்று (நவம்பர் 18) நடத்தினர்.
அப்போது, 2018ஆம் ஆண்டு துருக்கியில் சவூதி தூதரகத்தில் கொடூரமாகக் கொலை செய்யப்பட்ட சவூதி செய்தியாளர் ஜமால் கஷோகி குறித்து சவூதி இளவரசரிடம் ‘ஏபிசி’ செய்தியாளர் மேரி புரூஸ் கேள்வியெழுப்பினார்.
விருந்தினராக வந்திருப்பவரை அவமதிக்கும் வகையில் எழுப்பப்பட்ட கேள்வி அது என சாடிய டிரம்ப், ‘ஏபிசி’ செய்தி நிறுவனத்தின் உரிமத்தைப் பறித்துவிடுவேன் என மிரட்டினார்.
முன்னதாக, டிரம்ப்பின் குடும்ப உறுப்பினர்கள் நடத்திவரும் நிறுவனத்துடன் சவூதியைச் சேர்ந்த சொத்துச் சந்தை மேம்பாடு நிறுவனம் ஒன்று செய்துகொண்ட ஒப்பந்தம் குறித்து திரு டிரம்ப்பிடம் ‘ஏபிசி’ செய்தியாளர் கேள்வியெழுப்பினார்.
அதற்கு, அந்நிறுவனத்துக்கும் எனக்கும் எந்தவொரு தொடர்புமில்லை எனத் திரு டிரம்ப் பதிலளித்தார்.
மாலத்தீவில் டிரம்ப்பின் மகன்கள் சவூதி நிறுவனத்துடன் இணைந்து உல்லாசத் தலம் ஒன்றை அமைப்பதற்கான ஒப்பந்தத்தை நவம்பர் 17ஆம் தேதி உறுதிசெய்தனர்.
அதனைத் தொடர்ந்து சவூதி இளவரசரிடம் சர்ச்சைக்குரிய கேள்வியை அந்தச் செய்தியாளர் கேட்டார்.
தொடர்புடைய செய்திகள்
செய்தியாளர் கஷோகியின் கொடூரமான கொலையை நீங்கள் திட்டமிட்டு நடத்தியதாக அமெரிக்க உளவுத்துறை ஆய்வு தெரிவித்தது என்றும் 2011ஆம் ஆண்டு செப்டம்பர் மாதம் அமெரிக்காமீது நடத்தப்பட்ட பயங்கரவாதத் தாக்குதலில் மாண்டோரின் குடும்பத்தினர் நீங்கள் ஓவல் அலுவலகத்திற்கு வந்துள்ளதால் கோபமடைந்துள்ளனர் என்றும் அவர் கூறினார்.
அதற்கு, அக்கொலைக்கும் எனக்கும் எந்தவொரு தொடர்பும் இல்லை என சவூதி இளவரசர் விளக்கமளித்தார்.
சவூதி அரேபிய அரசையும் அந்த நாட்டு மன்னரையும் இளவரசர்களையும் கடுமையாக விமர்சித்து கட்டுரைகளை எழுதி வந்தவர் கொலைசெய்யப்பட்ட செய்தியாளர் கஷோகி என்பது குறிப்பிடத்தக்கது.