சவூதி விமானநிலையத் தாக்குதல்: 12 பேர் கொல்லப்பட்டனர்

ரியாத்: சவூதி அரேபியத் தலைநகர் ரியாத்தில் உள்ள கிங் காலிட் விமான நிலையத்தில் சனிக்கிழமை (அக்டோபர் 10) ஹூதி போராளிகள் நடத்திய தாக்குதலில் 12 பேர் உயிரிழந்தனர். அதோடு அத்தாக்குதலில் 309 பேர்கள் காயமடைந்துள்ளனர் என்று சவூதி அரசாங்க அதிகாரிகள் தெரிவித்தனர்.

விமான நிலையத் தாக்குதலில் பலியானோரில் சவூதி குடிமக்கள் நால்வர், பங்ளாதேஷியர் இருவர், அமெரிக்கா, ஜோர்தான், பாலஸ்தீனம், சிரியா, சூடான், எகிப்து ஆகிய நாடுகளைச் சேர்ந்த தலா ஒருவர் அடங்குவர் என்று உறுதிசெய்யப்பட்டுள்ளது. அந்த விமான நிலையத்தின் அனைத்துச் செயல்பாடுகளும் ரத்து செய்யப்பட்டுள்ளன.

சவூதி அரேபியா தலைமையில் அமைக்கப்பட்ட பல நாடுகளின் ராணுவக் கூட்டமைப்பு இத்தாக்குதலுக்குத் தக்க பதிலடி கொடுக்கப்படும் என்று சூளுரைத்துள்ளது.

ஏமனில் சவூதி அரேபியாவின் ஆதரவில் இயங்கும் அரசாங்கத்துக்கும் தற்போது அந்நாட்டின் பல பகுதிகளைக் கைப்பற்றியுள்ள ஹூதி போராளி அமைப்புக்கும் இடையிலான போர் அண்மையில் தீவிரமடைந்து வருகிறது.

சவூதி அரேபியாவின் கிழக்குப் பகுதியில் உள்ள கிங் ஃபாஹாட் அனைத்துலக விமான நிலையம் மீதும் சனிக்கிழமை ஓர் ஏவுகணை வீழ்ந்ததாக ராணுவக் கூட்டமைப்பு குறிப்பிட்டது.

ஏற்கெனவே கடந்த சில நாள்களாகச் சவூதி அரேபிய விமான நிலையங்களில் ஹூதி அமைப்பினர் நடத்திய தாக்குதல்களில் சவூதி அரேபியாவைச் சேர்ந்த விமானி உட்பட பலர் உயிரிழந்ததை அடுத்து இந்தத் தாக்குதல் நடந்துள்ளது.

சவூதி அரேபிய விமானப் போக்குவரத்து ஆணையம் அன்றைய தினம் வெளியிட்ட அறிக்கையில் காயமடைந்தோரில் பலர் தீவிர சிகிச்சையில் இருப்பதாகவும் விமான நிலையத்துக்கு ஏற்பட்ட சேதங்கள் ஆய்வு செய்யப்படுவதாகவும் தெரிவித்தது.