இலங்கையின் எதிர்காலத்தை தீர்மானிக்கும் அதிபர் தேர்தலில் வாக்களிப்பு நிறைவு

கொழும்பு: இலங்கையில் முன்னெப்போதும் இல்லாத பொருளியல் நெருக்கடியைத் தொடர்ந்து, அதன் எதிர்காலத்தை தீர்மானிக்கப்போகும் அதிபர் தேர்தலில் வாக்குப்பதிவு சனிக்கிழமை (செப்டம்பர் 21) நடைபெற்றது.

தற்போதைய அதிபர் ரணில் விக்கிரமசிங்க, எதிர்க்கட்சித் தலைவர் சஜித் பிரேமதாச, இடதுசாரி கூட்டணித் தலைவர் அனுர குமார திசாநாயக்க ஆகியோர் இடையே கடும் போட்டி நிலவியது. அண்மைய கருத்துக்கணிப்பு ஒன்றில் அனுர குமார முன்னணி வகித்ததை ராய்ட்டர்ஸ் சுட்டியது.

சிக்கன நடவடிக்கைகளைச் செயல்படுத்திய பின்னர், பதவியை தக்கவைத்துக்கொள்வதில் அதிபர் ரணில் கடும் சவாலை எதிர்கொண்டுள்ளார்.

உள்ளூர் நேரப்படி காலை 7 மணிக்குத் தொடங்கிய வாக்களிப்பு மாலை 4 மணியுடன் நிறைவடைந்தது. நாடு முழுவதும் வாக்களிப்பு அமைதியான முறையில் நடந்தேறியது.

“இலங்கையின் தேர்தல் வரலாற்றில் மிகவும் அமைதியான தேர்தல் என 2024 அதிபர் தேர்தல் பதிவு செய்யப்படும்,” என்று தேர்தல் ஆணையாளர் ஆர்எம்ஏஎல் ரத்நாயக்க தெரிவித்துள்ளார்.

வாக்களிப்பு நிலையங்களில் இருந்து வாக்குப் பெட்டிகள் வாக்கெண்ணும் நிலையங்களுக்கு கொண்டு செல்லப்பட்டன. தேர்தல் முடிவுகள் சனிக்கிழமை நள்ளிரவில் வெளிவரத் தொடங்கும் என்றும் ஞாயிற்றுக்கிழமை (செப்டம்பர் 22) வெற்றியாளர் அறிவிக்கப்படுவார் என எதிர்பார்க்கப்படுகிறது.

இலங்கையின் 22 மில்லியன் மக்களில் 17 மில்லியனுக்கும் அதிகமானோர் இத்தேர்தலில் வாக்களிக்கத் தகுதிபெற்றனர். 38 வேட்பாளர்கள் போட்டியிடுகின்ற நிலையில், நாடளவில் 13,421 வாக்களிப்பு நிலையங்களில் வாக்களிப்பு நடைபெற்றது.

பிற்பகல் 4 மணி நிலவரப்படி, கிட்டத்தட்ட 70 விழுக்காட்டினர் வாக்குகளைப் பதிவு செய்தனர்.

தொடர்புடைய செய்திகள்

இலங்கை அதிபர் தேர்தல்: பிரசாரம் ஓய்ந்தது

அதிபர் தேர்தலால் வாழ்வு சிறக்கும் என்ற நம்பிக்கையில்லை: இலங்கைத் தமிழர்கள்

திருகோணமலை மாவட்டத்தைச் சேர்ந்த ஜோன் பிலிப் லூயிஸ் என்பவர் தம் 106வது வயதில் தனது வாக்கைப் பதிவு செய்தார்.

வாக்களிப்பு தினத்தில் வன்முறைச் சம்பவங்களையும் சட்ட மீறல்களையும் கட்டுப்படுத்த காவல்துறையினர் பாதுகாப்புப் பணிகளில் ஈடுபடுத்தப்பட்டதுடன், தேர்தல் கண்காணிப்பு அமைப்புகள் கண்காணிப்பில் ஈடுபட்டன.

பொருளியல் நெருக்கடி ஏற்பட்ட நிலையில், இலங்கை கடனில் மூழ்கியது. அந்நியச் செலாவணி கையிருப்பு இன்றி திவால் நிலைக்கு தள்ளப்பட்டது.

விலைவாசி தாறுமாறாக உயர்ந்த நிலையில், மக்கள் போராட்டம் வெடித்தது. அதிபராக இருந்த கோத்தபய ராஜபக்சே, பதவியிலிருந்து விலகி நாட்டைவிட்டு தப்பியோடினார். பின்னர் பதவியேற்ற ரணில், இந்தியா, அனைத்துலகப் பண நிதியம், உலக நாடுகளின் உதவியை பெற்று நிலைமையைச் சீர்செய்தார்.

இப்போது பொருளியல் பிரச்சினைகளில் இருந்து இலங்கை ஓரளவுக்கு மீண்டு வந்துள்ளது. இந்நிலையில், அதிபர் ரணிலின் பதவிக்காலம் முடிவுக்கு வந்ததை தொடர்ந்து, மீண்டும் தேர்தல் அறிவிக்கப்பட்டது.

இதில் மீண்டும் போட்டியிடும் ரணில், தாம் செய்த பொருளியல் மீட்பு செயல்பாடுகளை சீர்துாக்கிப் பார்த்து மக்கள் வாக்களிக்க வேண்டும் என்று வேண்டுகோள் விடுத்தார்.