‘இடாய்’ சூறாவளியால் மொசாம்பிக்கில் 200க்கும் அதிகமானோர் பலி

ஹராரே: ஆப்பிரிக்க கண்டத்தில் பல மில்லியன் மக்கள் கடுமையாக பாதிக்கப்பட்டுள்ளதற்கு காரணமான ‘இடாய்’ சூறாவளி மிகப்பெரிய பேரழிவை உருவாக்கியுள்ளதாக ஐக்கிய நாடுகள் மன்றம் தெரிவித்துள்ளது.
ஆப்பிரிக்க நாடுகளான மொசாம்பிக், ஸிம்பாப்வே, மலாவி ஆகிய மூன்று நாடுகளும் பெரும் வெள்ளம் மற்றும் பேரழிவினால் கடந்த சில நாட்களாக கடுமையாக பாதிக்கப்பட்டுள்ளன.
இடாய் சூறாவளியின் தாக்கம் குறித்து பேசிய மொசாம்பிக்கின் அதிபர் பிலிப் நியூஸி, “இது ஒரு பெரும் மனிதப் பேரழிவு,” என்று வேதனை தெரிவித்தார்.
கடந்த வாரம் மொசாம்பிக்கை புரட்டிப்போட்ட இடாய் சூறாவளியினால் அந்நாட்டில் மட்டும் 1,000 பேருக்கு மேல் உயிரிழந்திருக்கலாம் என்று அஞ்சப்படுகிறது. இருப்பினும், இதுவரை பலி எண்ணிக்கை 200ஐ தாண்டியுள்ளதாக அதிகாரபூர்வத் தகவல்கள் தெரிவிக்கின்றன.