தத்தளிக்கும் தாய்லாந்து சுற்றுப்பயணத் துறைக்கு கைகொடுக்கும் இந்தியர்கள்

பேங்காக்: தத்தளித்துக்கொண்டு இருக்கும் தாய்லாந்து சுற்றுப்­பயணத் துறைக்கு இந்திய சுற்றுப்­பயணிகள் கைகொடுத்து வரு­கின்றனர். புக்கெட் தீவுக்குச் செல்லும் சீனப் பயணிகளின் எண்ணிக்கை குறைந்துவரும் வேளையில், இந்தியாவிலிருந்து வரும் சுற்றுப்பயணிகளின் எண்­ணிக்கை உயர்ந்திருக்கிறது.

"இப்போது புதிய வளர்ச்சி வாய்ப்பு ஒன்றை நாங்கள் காண்­கிறோம். சீனர்கள் முன்பு செய்தது­ போல் தாய்லாந்து சுற்றுப்பயணத் துறையின் வளர்ச்சியை இந்தி­யர்கள் முன்னெடுத்துச் செல்­ கின்­றனர்," என்று 'உ விஜிட்' கேளிக்கை விடுதியின் பொது நிர்வாகி கோங்சக் கூபொங்ச­கோர்ன் தெரிவித்தார்.

முன்னதாக, சீன சுற்றுப்பயணி­ களின் வருகையால் தாய்லாந்தின் சுற்றுப்பயணத் துறை ஆண்டுக்கு சுமார் 10 விழுக்காடு வளர்ச்சி அடைந்து வந்தது.

ஆனால் புக்கெட் தீவில் கடந்த ஆண்டு நிகழ்ந்த படகு விபத்தில் சீன நாட்டவர் 46 பேர் உயிரிழந்­ததைத் தொடர்ந்து, மீண்டும் அசம்பாவிதம் நிகழ்ந்துவிடுமோ என்ற அச்சத்தில் சீன சுற்றுப்­பயணி­களின் வருகை வெகுவாக குறைந்துள்ளது.

அத்துடன், தாய்லாந்துக்கு அந்நாட்டுப் பயணிகளின் வருகை குறைந்து காணப்படுவதற்கு மற்றொரு காரணம், சீனப் பொரு­ளியல் மெதுவடைந்து வருவதே.

மற்றொரு புறம், இந்தியாவின் பொருளியல் வளர்ச்சியால் நடுத்­­ தர வருமானப் பிரிவினரின் எண்ணிக்கையும் உயர்ந்து வரு­ கிறது. அத்துடன், தாய்லாந்துக்கும் இந்தியாவுக்கும் இடையிலான விமானச் சேவைகள் அதிகரித்து உள்ளதும் தாய்லாந்துக்குச் செல்ல இந்தியர்களுக்கான விசா தள்ளு­படி செய்யப்பட்டிருப்பதும் இந்திய சுற்றுப்பயணிகளின் எண்ணிக்கை உயர்வதற்கு முக்கிய காரணங்­களில் சில.

தற்போது தாய்லாந்துக்கு வரும் சுற்றுப்பயணிகளில் 28 விழுக்காட்டினர் சீனர்களாகவும் நான்கு விழுக்காட்டினர் இந்தியர்­களாகவும் உள்ளனர். ஆயினும், பத்து ஆண்டுகளில் இந்திய சுற்றுப்பயணிகளின் எண்ணிக்கை 15 விழுக்காடாக அதிகரிக்கும் என முன்னுரைக்கப்படுகிறது.