மாணவர் முரசு
இ-பேப்பர்
ஜனநாயகக் கட்சியைச் சேர்ந்த நான்கு பெண் உறுப்பினர்களுக்கு எதிரான கண்டனங்களை டுவிட்டர் மூலம் வெளியிட்ட அமெரிக்க அதிபர் டோனல்ட் டிரம்ப்பை அமெரிக்காவின் நாடாளுமன்றக் கீழவை கண்டித்துள்ளது.
திரு டிரம்ப்பின் கருத்துகள் இனவாதம் மிக்கவை என்றும் அதனால் புதிய குடியேறிகளுக்கு எதிரான பயத்திற்கும் வெறுப்புக்கும் அங்கீகாரம் கிடைத்துள்ளது என்றும் குறிப்பிடும் தீர்மானத்திற்குக் கீழவையில் 240 ஆதரவு வாக்குகள் கிடைத்தன. 187 உறுப்பினர்கள் இந்தத் தீர்மானத்திற்கு எதிராக வாக்களித்தனர்.
இடதுசாரி கொள்கைகளைக் கொண்ட ஜனநாயக நாடாளுமன்ற உறுப்பினர் இல்ஹன் ஓமார், அமெரிக்காவின் தற்போதைய நிர்வாகத்தைக் கண்டிக்கும் வகையில் கருத்துரைத்திருந்தார். அவருக்கு ஆதரவாக ஜனநாயகக் கட்சியைச் சேர்ந்த மூன்று பெண் நாடாளுமன்ற உறுப்பினர்கள் பேசியுள்ளனர். அடுத்து திரு டிரம்ப், சிலர் அமெரிக்காவுக்குத் தொடர்ந்து புத்திமதிகளைக் கூறுவதை விடுத்து தங்கள் சொந்த நாட்டிற்குத் திரும்பலாம் என டுவிட்டரில் கூறினார். திருவாட்டி ஓமார் சோமாலியாவில் பிறந்த கறுப்பினத்தவர் என்பதால் திரு டிரம்ப்பின் கருத்தில் இனவாதம் இருப்பதாக அவரை எதிர்ப்பவர்கள் கூறுகின்றனர். வேறு சிலரோ, வேறொரு நாட்டிலிருந்து வரும் குடியேறிகள் அமெரிக்காவைக் குறைகூறினால் அமெரிக்க அதிபர் இதைத் தவிர வேறு என்ன கூற முடியும் எனக் கருதுகின்றனர்.
தமது கருத்தில் இனவாதமே இல்லை என்று திரு டிரம்ப், அழுத்தம் திருத்தமாக டுவிட்டரில் கூறியுள்ளார்.
