ஜெர்மானிய ஃபார்முலா ஒன் கார் பந்தயத்தில் வென்றதன் மூலம் 91 வெற்றிகளை ஈட்டி, முன்னாள் நட்சத்திரம் மைக்கல் ஷுமாக்கரின் சாதனையைச் சமன் செய்தார் மெர்சிடிஸ் குழுவின் லூவிஸ் ஹேமில்டன்.
இதையடுத்து, ஹேமில்டனுக்கு வாழ்த்து தெரிவித்த ஷுமாக்கரின் மகன் மிக், தம் தந்தை இரண்டாம் முறையாக மெர்சிடிஸ் குழுவின் சார்பில் எஃப்1 பந்தயங்களில் பங்கேற்றபோது அணிந்த சிவப்புத் தலைக்கவசங்களில் ஒன்றை அவருக்குப் பரிசாக அளித்தார். அதைப் பெற்றுக்கொண்ட ஹேமில்டன், “மிக்க நன்றி. இது எனக்குக் கிடைத்த பெரும் கௌரவம்,” என்றார்.
நேற்று முன்தினம் நடந்த ஜெர்மானிய எஃப்1 பந்தயத்தில் ரெட் புல் குழுவின் மேக்ஸ் வெர்ஸ்டாப்பன் இரண்டாவதாகவும் ரெனால்ட் குழுவின் டேனியல் ரிக்கார்டோ மூன்றாவதாகவும் வந்தனர்.