நேசோ: உலகின் ஜேம்ஸ் பாண்ட் ரசிகர்களை துக்கத்தில் ஆழ்த்திய நடிகர் ஷான் கானரியின் நினைவுகளை மற்றொரு ஹாலிவுட் பிரபலம் அர்னால்ட் தமது டுவிட்டரில் பகிர்ந்துகொண்டு உள்ளார்.
“ஷான் கானரி ஒரு சகாப்தம். எல்லா காலத்திலும் போற்றப்பட வேண்டிய பெரும் நடிகர் அவர். நம் எல்லோருக்கும் முடிவில்லாத பொழுதுபோக்கைத் தந்த அவர்தான் எனது தூண்டுகோல். அந்த உலகப் பிரபலத்தின் குடும்பத்தோடு என் நினைவுகள் நிலைத்திருக்கும்,” என்று அர்னால்ட் குறிப்பிட்டுள்ளார். 90 வயதான ஷான் கானரியின் மரணத்தை அவரது குடும்பத்தினர் சனிக்கிழமை காலை உறுதிப்படுத்தினர். பகாமாஸ் தலைநகர் நேசோவில் தூங்கிக்கொண்டிருந்த நிலையிலேயே அவரது உயிர் பிரிந்ததாகத் தெரிவிக்கப்பட்டது. 1962ஆம் ஆண்டு ‘டாக்டர் நோ’ படத்தில் நடிக்கத் தொடங்கிய அவரின் ஏழு ஜேம்ஸ் பாண்ட் படங்களும் உலக மக்களைக் கவர்ந்தன. அவரது பழைய படங்களைப் பார்த்து ரசிப்போர் இன்றும் பலர் உள்ளனர்.