விமானத்தில் ஏறியபோது அதன் படிக்கட்டுகளில் தடுக்கி விழுந்த அதிபர் ஜோ பைடன்

அமெரிக்க அதிபர் ஜோ பைடன் ‘ஏர் ஃபோர்ஸ் ஒன்’ விமானத்தில் நேற்று ஏறியபோது அதன் படிக்கட்டுகளில் தடுக்கி விழுந்து மீண்டெழும் காட்சிகளைக் காட்டும் காணொளி சமூக ஊடகங்களில் வேகமாக பரவி வருகிறது. விமானம் மூலம் மேரிலாந்திலிருந்து புறப்பட்டு அட்லாண்டா நகருக்கு அவர் செல்லவிருந்தார்

அந்த விமானத்தின் படிக்கட்டுகளில் அவர் பாதி தூரம் ஏறிவிட்ட நிலையில் அவர் தடுக்கி விழப் பார்த்தார். தொடர்ந்து படிக்கட்டுகளில் ஏறிய அவர் அதில் தடுக்கி விழுந்து உடனடியாக எழுந்துவிட்டார். இறுதியாக படிக்கட்டுகளில் ஏறி முடித்த அவர், கீழே நின்றிருந்த அதிகாரிகளிடம் கையசைத்துவிட்டு உடனடியாக விமானத்திற்குள் நுழைந்தார்.

இந்தச் சம்பவம் குறித்து ஊடகங்களின் கேள்விகளுக்குப் பதிலளித்த வெள்ளை மாளிகை பேச்சாளர், திரு பைடன் “100% நலமாக” இருப்பதாகச் சொன்னார்.

“காணொளியைப் பார்த்தால் உங்களுக்குத் தெரியும், வெளியே பலத்த காற்று வீசியதென்று. விமானத்தின் படிக்கட்டுகளில் ஏறியபோது நானே சற்று நேரம் நிலைதடுமாறினேன்,” என்றார் அப்பேச்சாளர்.