அடுத்த சுற்றுக்கு முன்னேறியது நெதர்லாந்து, பெல்ஜியம்

19 Jun 2021 05:30

ஆம்ஸ்டர்டாம்: யூரோ கிண்ணக் காற்பந்துப் போட்டிகளில் ஆஸ்திரியாவை வீழ்த்திய நெதர்லாந்தும், டென்மார்க்கை வீழ்த்திய பெல்ஜியமும் அடுத்த சுற்றுக்கு முன்னேறின.

ஆஸ்திரியாவுக்கு எதிரான ஆட்டத்தின் முற்பாதி நேரத்தின்போது பெனால்டி வாய்ப்பில் முன்னிலை பெற்ற நெதர்லாந்து பிற்பாதியில் மீண்டும் ஒரு கோலைப் போட்டது.

இதையடுத்து நெதர்லாந்து 2-0 கோல் எண்ணிக்கையில் ஆஸ்திரியாவைத் தோற்கடித்தது.

'சி' பிரிவுக்கான முதல் ஆட்டத்தில் ஏற்கெனவே உக்ரைனை வீழ்த்தியிருந்த நெதர்லாந்து, மொத்தம் 6 புள்ளிகள் பெற்று அடுத்த சுற்றுக்கு முன்னேறியுள்ளது.

வரும் திங்கட்கிழமை நடைபெறவுள்ள ஆட்டத்தில் உக்ரைனை வீழ்த்தினால் மட்டுமே ஆஸ்திரிய அணியால் அடுத்தச் சுற்றுக்கு முன்னேற முடியும்.

பி பிரிவு ஆட்டத்தில் டென்மார்க்கை 1-2 என்ற கோல் கணக்கில் பெல்ஜியம் வென்றது.

ஆட்டம் தொடங்கிய இரண்டாவது நிமிடத்தில் கோல் போட்டு அசத்திய டென்மார்க் அணியால் அந்த முன்னிலையை கடைசி வரை தக்கவைத்துக் கொள்ள முடியவில்லை.

கோலைச் சமன் செய்ய முடியாமல் தடுமாறிய பெல்ஜியம் கெவின் டி பிரய்னின் அபார

ஆட்டத்தால் மீண்டெழுந்தது.

54வது நிமிடத்தில் லுகாகு உதைத்த பந்தை கெவின் டி பிரய்ன சரியான நேரத்தில், தோர்ஹன் ஹசார்ட்டிடம் கொடுக்க, அவர் அதைக் கோலாக்கி ஆட்டத்தைச் சமன் செய்தார்.

70வது நிமிடத்தில் கெவின் டி பிரய்ன ஒரு கோல் போட்டு அணியை வெற்றி பெறச் செய்தார். ஏற்கெனவே ரஷ்யாவை வெற்றி கொண்டிருந்த பெல்ஜியம், இந்த வெற்றியை தொடர்ந்து அடுத்தச் சுற்றுக்கு முன்னேறியுள்ளது.