மாணவர் முரசு
இ-பேப்பர்
மணிலா: மகள் சாரா டுட்டர்டே-கார்பியோவிற்கு எதிராக துணை அதிபர் பதவிக்குப் போட்டியிடுவதைத் தவிர்த்து செனட்டர் பதவிக்குப் போட்டியிடுகிறார் பிலிப்பீன்ஸ் அதிபர் டுட்டர்டே. அவர் துணை அதிபர் பதவிக்குப் போட்டியிடுவார் என்று அவரது ஊடகச் செயலாளர் கூறியிருந்தார்.
டுட்டர்டே மகள் சாரா, தந்தையின் கட்சியின்கீழ் அல்லாமல், முன்னாள் அதிபர் கிளோரியோ அர்ரோயோவின் கட்சியின் கீழ், அதிபர் வேட்பாளரான முன்னாள் செனட்டர் ஃபெர்டினண்ட் மார்கோசுடன் துணை அதிபர் பதவிக்குப் போட்டியிடுகிறார்.
இதற்கிடையே, மார்கோசுக்கு ஆதரவு தெரிவிக்க மறுத்துவிட்ட டுட்டர்டே, மற்றொரு அதிபர் வேட்பாளரும் தனது நீண்டகால உதவி யாளருமான கோவிற்கு ஆதரவு அளிப்பதாக சொன்னார்.
முன்பு துணை அதிபர் பதவிக்கு போட்டியிட மனுத்தாக்கல் செய்திருந்த கோ, அதைத் திரும்ப பெற்றுவிட்டு அதிபர் பதவிக்கு போட்டியிட பதிவு செய்தார் என்பது குறிப்பிடத்தக்கது.
கோவுடன் இணைந்து டுட்டர்டே துணை அதிபர் பதவிக்குப் போட்டியிடுவார் என்ற பேச்சும் முன்னர் நிலவியது.
எனவே துணை அதிபர் தேர்தல், அவருக்கும் அவர் மகளுக்கும் இடையிலான போட்டியாக இருக்குமோ என்றுகூட கருதப்பட்டது.
துணை அதிபர் போட்டியில் இருந்து டுட்டர்டே விலகியது குறித்து பேசிய கோ, குடும்பத் தகராறைத் தவிர்க்க விரும்புவதாக சொன்னார்.