மியன்மாரிலிருந்து ஏராளமானோர் வெளியேறுகின்றனர்

ராணுவத்திற்கும் போராளிக் குழுவிற்கும் இடையிலான சண்டையிலிருந்து தப்பி, ஆற்றைக் கடந்து தாய்லாந்தில் நுழைய முயலும் மியன்மார் மக்கள். படம்: ஏஎஃப்பி

17 Jan 2022 05:30

யங்கூன்: மியன்மாரின் முக்கிய நகரத்திலிருந்து பல புத்த பிக்குகள் உட்பட ஆயிரக்கணக்கானவர்கள் வெளியேறியதாகத் தெரிவிக்கப்பட்டுள்ளது.

மியன்மாரில் சென்ற ஆண்டு நடந்த ஆட்சிக்கவிழ்ப்புக்கு எதிராக ராணுவம், போராளிக் குழுக்களுக்கு இடையே ஏற்பட்ட கடுமையான சண்டையால் தங்கள் வசிப்பிடங்களைவிட்டு ஆயிரக்கணக்கான மக்கள் வெளியேறினர்.

கடந்த வாரம் கிழக்கு மியன்மாரின் கயா மாநிலத்தில் உள்ள லோய்காவ் நகரத்தில் கடுமையான சண்டை நடந்தது.

அதனைத் தொடர்ந்து புத்த பிக்குகள் உட்பட அந்நகரில் வசித்த பாதிக்கும் மேற்பட்டவர்கள் அங்கிருந்து வெளியேறிவிட்டதாக ஐநா கூறியது.

"நாங்கள் இங்கு தங்குவது சாத்தியமற்றது," என்றார் புத்த பிக்கு ஒருவர். தன்னுடன் மேலும் 30 பிக்குகள் வெளியேறுவதாகவும் அவர் சொன்னார்.

கோயில்கள் பாதுகாப்பான புகலிடங்களாகக் கருதப்படும் ஒரு நாட்டில் பிக்குகள் வெளியேறுவது அசாதாரணமானதாக பார்க்கப்படுகிறது.