மாணவர் முரசு
இ-பேப்பர்
கியவ்: ஒரு மாத போருக்குப் பிறகும், ரஷ்யாவால் உக்ரேனை முழுமையாகக் கைப்பற்ற முடியவில்லை. எனவே, உக்ரேனின் குறிப்பிட்ட ஒரு பகுதியை தம் கட்டுப்பாட்டிற்குள் இருக்கும்படியாக செய்யவும் அதற்காக உக்ரேனை இரண்டாக பிளவுபடுத்தவும் ரஷ்யா முயற்சிக்கிறது என்று உக்ரேனிய ராணுவப் பிரிவு கூறி உள்ளது.
சொல்லப்போனால், "ரஷ்யா, உக்ரேனுக்குள் தென்கொரியா, வடகொரியாவை உருவாக்கப் பார்க்கிறது," என்றார் உக்ரேனின் ராணுவத் தலைவர் கைரிலோ புடானோவ்.
அத்துடன் ரஷ்ய ஆக்கிரமிப்பு பகுதியில், உக்ரேன் விரைவில் கொரில்லா தாக்குதலைத் தொடங்கஉள்ளதாகவும் அவர் சொன்னார்.
'ஒரு விழுக்காடு ஆயுதம் போதும்'
இதற்கிடையே, உக்ரேனுக்கு ஆயுதங்கள் தந்து உதவுவதற்கு மேற்கத்திய நாடுகளுக்குப் போதிய தைரியம் இல்லை என்று சாடியுள்ளார் உக்ரேனிய அதிபர் ஸெலன்ஸ்கி.
மேற்கத்திய நாடுகள் தங்கள் கையிருப்பில் வைத்துள்ள ஆயுதக் குவியல்களில், ஒருபகுதியை தங்களுக்கு கொடுக்குமாறு அவர் கேட்டுக்கொண்டார். அத்துடன் மேற்கத்திய நாடுகள், ரஷ்யாவைக் கண்டு பயப்படுகின்றனவா என்றும் அவர் கேட்டார்.
"பல நாடுகள், கவச எதிர்ப்பு, விமான எதிர்ப்பு ஏவுகணைகள், சிறிய ஆயுதங்களை அனுப்புவதாக உறுதியளித்துள்ளன. ஆனால் எங்களுக்கு பீரங்கிகள், விமானங்கள், கப்பல் எதிர்ப்பு அமைப்புகள் ஆகியவை வேண்டும்.
"இவை அனைத்தையும் நாங்கள் கேட்பது உக்ரேனின் சுதந்திரத்திற்காக மட்டுமல்ல, ஐரோப்பாவின் சுதந்திரத்திற்காகவும்தான்," என்று ஸெலன்ஸ்கி கூறினார்.
நேட்டோவிடம் இருக்கும் விமானங்களில் 1 விழுக்காடு, பீரங்கிகளில் 1 விழுக்காடு மட்டுமே உக்ரேனுக்குத் தேவை என்றும் அதற்கு மேல் நாங்கள் கேட்கப் போவதில்லை என்றும் அவர் கூறினார்.
உக்ரேனுக்கு ஆயுத உதவி செய்து மேற்கத்திய நாடுகள், ஜெட் விமானங்களை அனுப்புவது குறித்து இன்னமும் எந்த முடிவும் எடுக்கவில்லை.
சுவிஸ் கைக்கடிகாரங்கள் பறிமுதல்
இந்நிலையில், சுவிட்சர்லாந்தின் மிகவும் விலையுயர்ந்த கைக்கடிகாரங்களை ரஷ்யப் உளவுப் படையினர் பறிமுதல் செய்துள்ளதாக சுவிஸ் நாளிதழ் ஒன்று செய்தி வெளியிட்டுள்ளது.
பல மில்லியன் டாலர் மதிப்பு உடைய அடேமர்ஸ் பிகெட் கைக்கடிகாரங்கள் மாஸ்கோவில் உள்ள அதன் நிறுவனத்தில் இருந்து கைப்பற்றப்பட்டதாக செய்தி கூறுகிறது.
உக்ரேன் மீதான ரஷ்யாவின் படையெடுப்பைத் தொடர்ந்து, ரஷ்யாவிற்கு ஆடம்பரப் பொருள்களை ஏற்றுமதி செய்ய சுவிஸ் விதித்த பொருளாதாரத் தடைக்குப் பதிலடி கொடுக்கும் விதமாக ரஷ்யா இதனைச் செய்துள்ளதாகக் கூறப்படுகிறது.
சுவிட்சர்லாந்து கைக்கடிகார ஏற்றுமதிச் சந்தைப் பட்டியலில் 17வது இடத்தில் உள்ளது ரஷ்யா. சென்ற ஆண்டு மட்டும், 380 மில்லியன் வெள்ளி மதிப்புடைய கைக்கடிகாரங்கள் ஏற்றுமதியாயின.