மாணவர் முரசு
இ-பேப்பர்
மலேசியாவிலும் இந்தோனீசியாவிலும் மில்லியன்கணக்கானோர் பயணம் செய்யக்கூடும் என்று எதிர்பார்க்கப்படுகிறது.
கோலாலம்பூர்: கொவிட்-19 கட்டுப்பாடுகள் இல்லாத நோன்புப் பெருநாள் கொண்டாட்டம் மலேசியாவிலும் இந்தோனீசியாவிலும் களைகட்டியுள்ளது.
இரண்டு ஆண்டுகளில் முதல்முறையாக நோன்புப் பெருநாள் கொண்டாட்டத்திற்காக இருநாடுகளிலும் பெருமளவிலான மக்கள் சொந்த ஊர்களுக்குத் திரும்பத் தொடங்கியுள்ளனர்.
தடுப்பூசி போட்டுக்கொள்ளாதவர்களும் எல்லை கடந்து பயணம் செய்யலாம், வீடுகளில் ஒன்றுகூடுவோருக்கான எண்ணிக்கை கட்டுப்பாடு கிடையாது என்பது போன்ற தளர்வுகளை மலேசியா சென்ற வாரம் அறிவித்தது.
இதனையடுத்து, பண்டிகை நேரத்தில் மலேசியாவின் முக்கிய சாலைகள், நெடுஞ்சாலைகளில் வாகன நெரிசல் ஏற்பட்டுள்ளது.
வடக்கு-தெற்கு நெடுஞ்சாலையில் பல வழித்தடங்களில் போக்குவரத்து நெரிசல் காணப்பட்டதாக மலேசிய நெடுஞ்சாலை ஆணையம் தெரிவித்தது.
கிட்டத்தட்ட இரண்டு மில்லியன் வாகனங்கள் நெடுஞ்சாலைகளைக் கடக்கக்கூடும் என்று எதிர்பார்க்கப்படுகிறது. எனவே, கூடுதல் பயண நேரத்திற்குத் திட்டமிட வேண்டும் என்று கேட்டுக்கொள்ளப் பட்டுள்ளது.
சந்தைகளில் குவிந்த மக்கள்
இதற்கிடையே, மலேசியாவில் மழையையும் பொருட்படுத்தாமல் நோன்புப் பெருநாளுக்கான சந்தைகளில் பொருட்களை வாங்குவதில் மக்கள் மும்முரம் காட்டுகின்றனர்.
இந்நிலையில், பண்டிகை நேரத்தில் விநியோகப் பற்றாக்குறையைத் தவிர்க்கும் நோக்கில் அத்தியாவசிய உணவுப் பொருள்களைத் தேவைக்கு அதிகமாக வாங்க வேண்டாம் என்று மலேசிய அரசாங்கம் பொது மக்களுக்கு அறிவுறுத்தியுள்ளது.
"நோன்புப் பெருநாளுக்காக பிள்ளைகள் வீட்டில் இருப்பதால், ஒரு மாதத்திற்குத் தேவையான கோழியை வாங்காதீர்கள். நோன்புப் பெருநாளுக்குத் தேவையானதை மட்டும் வாங்குங்கள்," என்றார் விவசாய, உணவுத் துறை அமைச்சர். இருப்பினும், சில பகுதிகளில் கோழிகளுக்குத் தட்டுப்பாடு ஏற்படுவதற்கான வாய்ப்புள்ளதை அவர் மறுக்கவில்லை.
இந்தோனீசியாவில் 20 மில்லியன் பேர் பயணம்
கட்டுப்பாடுகள் தளர்த்தப்பட்டு உள்ளதால் இந்தோனீசியாவில், பெருநாள் கொண்டாட்டத்திற்காக கிட்டத்தட்ட 20 மில்லியன் பேர் சொந்த ஊர்களுக்குத் திரும்புவார்கள் என்று எதிர்பார்க்கப்படுகிறது.
அங்கு பேருந்துகள், ரயில்கள், கடல் போக்குவரத்து என அனைத்திலும் மக்கள் கூட்டம் நிரம்பி வழிகிறது. 3வது தடுப்பூசி போட்டுக் கொண்டவர்கள் பயணத்திற்கான பரிசோதனை செய்யவேண்டிய தேவையில்லை என்று இந்தோனீசியா அறிவித்துள்ளது.