மாணவர் முரசு
இ-பேப்பர்
கலிஃபோர்னியா: கூகல் நிறுவனம் பெண் ஊழியர்களுக்குக் குறைந்த ஊதியம் வழங்கியதாக எழுந்த புகாரின் அடிப்படையில் அவர்களுக்கு 118 மில்லியன் டாலர் இழப்பீடு வழங்க முன்வந்துள்ளது.
2013 செப்டம்பர் முதல் கலிஃபோர்னியாவில் உள்ள கூகல் அலுவலகத்தில் பணியாற்றிய 15, 500 பெண் ஊழியர்களுக்கு இந்த இழப்பீட்டுத் தொகை வழங்கப்படும்.
ஒரே விதமான பதவிகளில் ஆண்களைவிடப் பெண்களுக்குக் குறைவான ஊதியம் வழங்கியதாகவும் தகுதி குறைவான பணிகளே பெண்களுக்கு வழங்கப்பட்டதாகவும் 2017ஆம் ஆண்டு கூகல் நிறுவனத்தின் முன்னாள் பெண் பணியாளர்கள் மூவர் வழக்கு தொடுத்தனர். கலிஃபோர்னியாவின் சம ஊதியச் சட்டத்தை கூகல் நிறுவனம் மீறியதாக அவர்கள் குற்றம்சாட்டினர்.
இம்மாதம் 21ஆம் தேதி நடைபெறும் விசாரணையில், கூகல் இவ்வாறு இழப்பீடு வழங்குவதற்கு நீதிபதி ஒப்புதல் அளிக்கவேண்டியது அவசியம். சென்ற ஆண்டு பெண் பொறியாளர்களுக்குக் குறைவான ஊதியம், ஆசிய வேலை விண்ணப்பதாரர்களைச் சரியாக நடத்தவில்லை எனும் புகார்களில் ஒன்றைத் தீர்ப்பதற்கு $2.5 மில்லியன் செலுத்தியது கூகல்.