வாஷிங்டன்: அமெரிக்காவின் முன்னாள் அதிபர் டோனல்ட் டிரம்பின் வளர்ச்சிக்கு உறுதுணையாக இருந்த அவரது முதல் மனைவி இவானா (படம்), 73, உயிரிழந்தார்.
வியாழக்கிழமையன்று அவசர உதவி எண்ணிற்கு வந்த அழைப்பைத் தொடர்ந்து, நியூயார்க் நகர காவல்துறையினர் இவானாவின் இல்லத்திற்குச் சென்றனர்.
அங்கு இவானா சுயநினைவின்றி கிடந்ததாகவும் அவரை மீட்டு மருத்துவமனையில் சேர்த்தபோது அவர் உயிரிழந்துவிட்டதாக மருத்துவர்கள் சொன்னதாகவும் அவர்கள் கூறினர்.
ஆரம்ப காலகட்டத்தில், டிரம்ப் பிரபல தொழிலதிபராக இருந்தபோது, இவானாவும் தொழில்களில் பங்கெடுத்து டிரம்ப்பின் தொழில் வளர்ச்சிக்கு உறுதுணையாக நின்றார்.
விவாகரத்து ஆன பிறகும், டிரம்ப் அதிபர் பதவிக்குப் போட்டியிட்டபோது, இவானா அவருக்கு ஆதரவாக இருந்து ஆலோசனைகள் வழங்கினார்.
1977ஆம் ஆண்டில் திருமணம் செய்துகொண்ட இவர்களுக்கு டிரம்ப் ஜுனியர், இவாங்கா, எரிக் ஆகிய மூன்று பிள்ளைகள் உள்ளனர். 1992ல் இவர்களுக்கு விவாகரத்து ஆனது.
அதன் பிறகு, டிரம்ப் ஹாலிவுட் நடிகையான மர்லா மப்லேசைத் திருமணம் செய்தார். அவரையும் விவாகரத்து செய்த டிரம்ப், 2005ஆம் ஆண்டு மெலேனியாவை மூன்றாவது திருமணம் செய்துகொண்டார்.