மாணவர் முரசு
இ-பேப்பர்
லண்டன்: பிரிட்டிஷ் பிரதமருக்கான போட்டியில் சக போட்டியாளரான லிஸ் டிரசைவிடத் தாம் பின்தங்கியிருப்பதாக ரிஷி சுனக் ஒப்புக்கொண்டுள்ளார்.
கன்சர்வேட்டிவ் கட்சி உறுப்பினர்கள் கலந்துகொண்ட நிகழ்ச்சியில் பேசிய சுனக், "நான் பின்தங்கியிருப்பதாக கருத்துக்கணிப்புகள் கூறுவது எனக்குத் தெரியும்," என்று தனது உரையைத் தொடங்கி, அனைவரின் ஆதரவையும் அவர் கோரினார்.
விலைவாசி குறையும் வரை, வரிகளைக் குறைக்கமாட்டேன் என்பதில் இருந்த தன்னுடைய உறுதி, பொதுவாக ஏற்றுக்கொள்ளப்படவில்லை, என்று முன்னாள் நிதி அமைச்சர் சுனக் சொன்னார்.
"இதனால் எனக்குப் பின்னடைவு ஏற்பட்டிருந்தாலும், உண்மையைக் கூறவேண்டுமென்றால் இதுதான் நிலைமை," என்றார் அவர்.
தொடர்ந்து பேசிய அவர், "நிதி ஆதாரமற்ற வரிக் குறைப்பு நடவடிக்கைகள், பொறுப்பற்றதனச் செயல்," என்றார்.
நிகழ்ச்சியில் பேசிய வெளியுறவு அமைச்சரான லிஸ் டிரஸ், பிரிட்டனின் வரி அமைப்பை முற்றிலும் மறுஆய்வு செய்து, வரிகளைக் குறைக்க நடவடிக்கை எடுப்பேன் என்றார். அது மிகவும் சிக்கலானது என்றாலும் மக்களுக்கு நியாயமானதாக இருக்கவேண்டும் என்றார்.
தற்காப்பு அமைச்சர் பென் வாலஸ், டிரஸ்ஸிற்கு தனது ஆதரவளித்து பேசினார். டிரஸ் உண்மையாகவும் நேர்மையானவராகவும் இருந்தார் என்றார் பென். எல்லாவற்றுக்கும் மேலாக டிரஸ் சொன்னதைச் செய்யக்கூடியவர் என்றும் அவர் சொன்னார்.
அமைச்சரவையில் இருந்து வெளியேறி, போரிஸ் ஜான்சனின் ஆட்சி கவிழ்வதற்கு காரணமாக இருந்து ரிஷி சுனக் தவறு செய்துவிட்டதாகவும் பென் வால்ஸ் சொன்னார்.