ரஷ்யாவின் பொருளியல் சரிவுக்குக் காரணமான போர்

உக்ரேனுடனான போரின் விளைவாக ரஷ்யாவுக்கு எதிராக விதிக்கப்பட்ட பொருளியல் தடைகள் காரணமாக, அதன் பொருளியல் இவ்வாண்டின் இண்டாம் காலாண்டில் குறிப்பிடத்தக்க அளவில் சுருங்கியது.

இவ்வாண்டு ஏப்ரல் மாதத்துக்கும் ஜூன் மாதத்துக்கும் இடைப்பட்ட காலத்தில் அதன் பொருளியல் கடந்த ஆண்டுடன் ஒப்புநோக்க 4% சரிந்தது என்று ரஷ்யாவின் புள்ளிவிவரத்துறை நேற்று முன்தினம் தெரிவித்தது.

கடந்த பிப்ரவரி மாதம் உக்ரேன் மீது ரஷ்யா படையெடுத்ததற்குப் பிறகு கணக்கிடப்பட்ட காலாண்டு அறிக்கையில் இந்த பொருளியல் சரிவு தென்பட்டுள்ளது.

இவ்வாண்டு முதலாம் காலாண்டில் ரஷ்யாவின் பொருளியல் 3.5% வளர்ச்சி கண்டது.

மேற்கத்திய நாடுகளின் பல்வேறு பொருளியல் தடைகளால் வெளிநாட்டு நாணயம் மற்றும் தங்க இருப்பு ஆகியவற்றில் தேக்கத்தால் ரஷ்யா அது பெற்று வந்த 600 பில்லியன் அமெரிக்க டாலர் (S$823 பில்லியன்) வருமானத்தில் கிட்டத்தட்ட பாதியை இழக்க நேரிட்டது.