மாணவர் முரசு
இ-பேப்பர்
நியூயார்க்: அமேசான் நிறுவனத்தின் வரலாற்றிலேயே மிகப் பெரிய ஆட்குறைப்புப் பணி இவ்வாரம் முதல் தொடங்கவுள்ளதாக பெயர் குறிப்பிட விரும்பாத நம்பகமான தரப்புகள் கூறுகின்றன. கிட்டத்தட்ட 10,000 பேரை நிறுவன, தொழில்நுட்பப் பணிகளிலிருந்து நீக்க நிறுவனம் திட்டமிட்டுள்ளதாகக் கூறப்படுகிறது.
வாடிக்கையாளர்கள் பொருள் அதிகம் வாங்கக்கூடிய இந்த விடுமுறைக் காலத்தில் இத்தகைய ஆட்குறைப்புக்கு அமேசான் திட்டமிட்டிருப்பதன்வழி, அனைத்துலகப் பொருளியல் நெருக்கடி நிறுவனத்தின்மீது கொண்டுள்ள தாக்கத்தை உணர முடிவதாகக் கூறப்படுகிறது.
அதிக எண்ணிக்கையில் ஊழியர்கள், குறைந்த அளவில் பொருள் விநியோகம் என இயங்கிவரும் அதன் உட்பிரிவுகளை அமேசான் ஆராய்ந்து ஆட்குறைப்பு நடத்த வேண்டிய கட்டாயம் எழுந்துள்ளதாக நம்பப்படுகிறது.
கொள்ளைநோய் சூழலில் அமேசான் என்றும் இல்லாத லாபத்தை ஈட்டியது. அதனால் ஈராண்டுகளில் அதன் ஊழியர் அணியையும் நிறுவனம் இருமடங்காக்கியது. இருப்பினும், இவ்வாண்டு முற்பாதியில் 20 ஆண்டுகளில் காணாத வளர்ச்சி சரிவையும் நிறுவனம் சந்தித்தது.