மாணவர் முரசு
இ-பேப்பர்
லண்டன்: பிரிட்டனின் ரயில்துறை ஊழியர்கள், கிறிஸ்மஸ் காலகட்டத்தில் போக்குவரத்துக் கட்டமைப்பை முடக்கும் நோக்கில் திட்டமிட்டிருந்த வேலை நிறுத்தத்தைத் தொடங்கியுள்ளனர்.
அந்நாட்டின் ஆகப் பெரிய ரயில்துறை தொழிலாளர் சங்கம் வேலை நிறுத்தத்துக்கு ஏற்பாடு செய்தது. சுமார் ஒரு மாதம் இந்த வேலை நிறுத்தம் நீடிக்கவுள்ளது.
லண்டன் உள்ளிட்ட பல பகுதிகளில் வேலைக்குச் செல்வோருக்கும் மற்ற பயணிகளுக்கும் நேற்று ரயில்கள் கிடைப்பது போராட்டமாக இருந்தது.
வேலை நிறுத்தத்தில் ஈடுபட்டுள்ளவர்கள் முக்கிய ரயில் நிலையங்களில் ஆர்ப்பாட்டத்தில் இறங்கினர். சுமார் 40,000 ரயில்வே ஊழியர்கள் இவ்வாரம் வேலை நிறுத்தம் செய்து வருகின்றனர். இரு முறை 48மணிநேரத்துக்கு வேலை நிறுத்தம் நடப்பில் இருக்கும்.
அந்நாள்களில் ரயில்கள் காலை 7.30 மணி முதல் மாலை 6.30 மணி வரை இயங்கும். ரயில் சேவைகளில் 20 விழுக்காடு மட்டுமே செயல்படும் என்று கருதப்படுகிறது.
கூடுதல் சம்பளம் வேண்டும் என்ற ரயில்வே ஊழியர்களின் கோரிக்கையை ஏற்றுக்கொள்ள முடியாது என்று பிரதமர் ரிஷி சுனாக் நேற்று மீண்டும் வலியுறுத்தினார்.
கடந்த 1980களுக்குப் பிறகு பிரிட்டனில் மிகப் பெரும் அளவில் இவ்வாண்டு வேலை நிறுத்தங்கள் நடந்து வருகின்றன. எரிசக்தி, மின்சாரம், உணவுப் பொருள்கள் ஆகியவற்றின் விலை உயர்வைச் சுட்டி பல்லாயிரம் ஊழியர்கள் வேலை நிறுத்தம் செய்து வருகின்றனர். தாதியர், அஞ்சல்துறை ஊழியர்கள், எல்லைப் பாதுகாப்பு அதிகாரிகள் போன்றோர் அவர்களில் அடங்குவர். அரசாங்க மருத்துவ மனைகளில் உள்ள இயன்மருத்துவ சிகிக்சை நிபுணர்களும் அவர்களுடன் சேரப்போவதாக நேற்று அறிவித்தனர்.