மாணவர் முரசு
இ-பேப்பர்
லிவர்பூல்: இங்கிலிஷ் பிரிமியர் லீக் காற்பந்தாட்டத்தில் தனது பரம வைரியான மான்செஸ்டர் யுனைடெட்டை 7-0 எனும் கோல் கணக்கில் வென்று அசத்தியுள்ளது லிவர்பூல்.
யுனைடெட் கடைசியாக இத்தனை கோல் வித்தியாசத்தில் தோல்வியடைந்து 92 ஆண்டுகள் ஆகிவிட்டன. அக்குழு தனது வரலாற்றில் ஓர் ஆட்டத்தில் ஏழு கோல்களுக்கு மேல் விட்டதும் இல்லை. அப்படிப்பட்ட வரலாற்றுச் சிறப்புமிக்க நிகழ்வைப் படைத்துள்ளது லிவர்பூல்.
முற்பாதியாட்டத்தில் இரு குழுக்களும் சமமான நிலையில் இருந்தன. லிவர்பூல் ஒரு கோலைப் போட்டு முன்னுக்குச் சென்றது.
எனினும், பிற்பாதியாட்டம் தொடங்கியதிலிருந்து லிவர்பூலின் கோல் வேட்டைத் தொடங்கியது. என்ன செய்வது என்று தெரியாமல் திக்குமுக்காடியது யுனைடெட்.
பலரைக் கவரும் வண்ணம் விளையாடிவந்த யுனைடெட்தானா இது என்ற கேள்வி எழும் அளவிற்கு அமைந்தது இந்த ஆட்டம். அதேவேளையில் இதற்கு முன்பு சிரமப்பட்டுவந்த லிவர்பூலிடம் மீண்டும் பழைய தன்னம்பிக்கையையும் வேகத்தையும் காணமுடிந்தது.
டார்வின் நுனியெஸ், மோ சாலா, கோடி காக்போ ஆகிய மூவரும் ஆளுக்கு இரண்டு கோல்களைப் போட்டனர். லிவர்பூலின் மற்றொரு கோலைப் போட்டவர் ராபர்ட்டோ ஃபர்மினோ.
இந்த ஆட்டத்தில் யுனைடெட் வெல்லும் என்ற எதிர்பார்ப்புகூட பலரிடையே இருந்தது. ஆனால் தனது ஆற்றலை அபாரமான முறையில் நிரூபித்தது லிவர்பூல்.
பிரிமியர் லீக் பட்டியலில் யுனைடெட் இன்னமும் மூன்றாவது இடத்தை வகிக்கிறது. எனினும், இதுவரை வளர்த்த தன்னம்பிக்கை இந்த ஆட்டத்திற்குப் பிறகு சுக்குநூறாவதைத் தவிர்ப்பதே யுனைடெட் நிர்வாகி எரிக் டென் ஹாக் எதிர்கொள்ளவிருக்கும் பெரிய சவாலாக இருக்கும்.