மாணவர் முரசு
இ-பேப்பர்
ஹாங்காங்: கேத்தே பசிபிக் ஏர்வேஸ் நிறுவனம் வடஅமெரிக்காவில் தனது இணையத் தளத்தில் ஹாங்காங் சென்று வருவதற்கான இலவச விமானச் சீட்டுகளை விநியோகிப்பதாக அறிவிப்பு ஒன்றை விடுத்திருந்தது.
அதனையடுத்து ஆயிரக்கணக்கானோர் அந்த இணையத் தளத்தில் இலவச விமானச் சீட்டுக்காகப் பதிவுசெய்யக் காத்திருந்தனர். அதேபோல் அமெரிக்கா, கனடாவில் இருந்து 4,445 விமானச் சீட்டுகள் இலவசமாக விநியோகம் செய்யப்பட்டுள்ளன. முதலில் பதிவு செய்பவர்களுக்கே முன்னுரிமை என்ற அடிப்படையில் விமானச் சீட்டுகள் விநியோகிக்கப்பட்டன. அதனையடுத்து ஏராளமானோர் முந்திக்கொண்டு இணையத் தளத்தில் பதிவுசெய்யக் காத்துக்கொண்டிருந்தனர். இருப்பினும் அனைத்து இலவசச் சீட்டுகளும் நண்பகலில் கொடுத்து முடிந்துவிட்டதாக அந்த நிறுவனம் தனது இணையத் தளத்தில் அறிவித்தது.
ஹாங்காங்குக்கு மீண்டும் சுற்றுப்பயணிகளை வரவழைத்து சுற்றுலாத்துறைக்கு உயிரூட்டும் ஹாங்காங்கின் திட்டத்தின் ஒரு பகுதியே இந்த இலவச விமானச் சீட்டு விநியோகம் என்று கூறப்படுகிறது.
உலக நிதிமையமாகத் திகழ்ந்த ஹாங்காங்கில் கொவிட்-19 பரவலால் நடைமுறைப்படுத்தப்பட்ட கடுமையான கட்டுப்பாடுகள் அங்கு நிதித்துறை, சுற்றுலாத்துறை ஆகியவற்றை முடக்கிப்போட்டு விட்டன. அவற்றுக்கு மீண்டும் புத்துயிர் கொடுக்கும் வகையில் ஹாங்காங் பல திட்டங்களைச் செயல்படுத்தி வருகிறது.