மாணவர் முரசு
இ-பேப்பர்
ஜப்பான் உச்சநிலை மாநாட்டில் கூடும் ஜி7 தலைவர்கள்
ஹிரோஷிமா: ரஷ்யாமீது கூடுதல் தடைகளையும் போர்க்களத்தில் அது பயன்படுத்தும் ஆயுதங்களுக்குக் கட்டுப்பாடுகளையும் விதித்து ஜி7 நாடுகள் ரஷ்யாவுக்கு நெருக்குதலை அதிகரிக்கும் என்று அமெரிக்க அதிபர் ஜோ பைடன் நிர்வாகத்தைச் சேர்ந்த மூத்த அதிகாரி ஒருவர் கூறியுள்ளார்.
ஜப்பானின் ஹிரோஷிமாவில் நடைபெறும் உச்சநிலை மாநாட்டின் முதல் நாளில், ரஷ்யா-உக்ரேன் போரில் உக்ரேனுக்கு ஆதரவளிப்பதாக அறிக்கை வெளியிட்டு தங்களது கடப்பாட்டை தலைவர்கள் மறுஉறுதிப்படுத்துவர். ரஷ்யாவில் இருந்து ஏறக்குறைய 70 பொருள்களுக்கு பைடன் நிர்வாகம் தடைவிதிக்க உள்ளது.
ஏற்கெனவே உள்ள தடைகளைச் சுற்றிச் சென்றதற்காக அல்லது நிதி ஆதரவு அளித்து போரை ஒருங்கிணைத்ததற்காக ஏறக்குறைய 300 பொருள்கள், கப்பல்கள், விமானங்களை தான் குறிவைக்கப் போவதாகவும் பைடன் நிர்வாகம் அறிவிக்கப் போகிறது.
போருக்குத் தேவையான பொருள்களைப் பெறுவதில் ரஷ்யாவின் ஆற்றலை அமெரிக்கா மேலும் முடக்கவுள்ளது. தடைவிதிப்பைத் தவிர்ப்பதில் நிலவும் குறைபாடுகளும் சரிசெய்யப்படும் என்று அந்த மூத்த அதிகாரி தெரிவித்தார்.
போர் முடியும்வரை ரஷ்யாவின் இறையாண்மை சொத்துகளை அசைக்க முடியாமல் வைத்திருப்பதில் ஜி7 நாடுகள் தொடர்ந்து கடப்பாடு கொள்ளும். அதோடு, ரஷ்ய எரிசக்தியைச் சார்ந்திருக்கும் நிலையை மேலும் குறைக்க அந்நாடுகள் முற்படும்.
உக்ரேனிய அதிபர் வொலோடிமிர் ஸெலென்ஸி மெய்நிகர் வழியாக ஜி7 கூட்டத்தில் பங்கேற்பார். கூடுதல் ஆயுத விநியோகத்துக்கான வாதத்தை முன்வைக்க, கடந்த வாரம் வெவ்வேறு ஐரோப்பிய நாடுகளின் தலைநகர்களுக்கு அவர் சென்று வந்தார்.
ஜி7 தலைவர்கள் நேற்று ஹிரோஷிமா அமைதி நினைவுச்சின்ன பூங்காவிற்குச் சென்றனர். அணுவாயுதப் பயன்பாட்டிற்கு கட்டுப்பாடு விதிப்பதில் அமெரிக்கா கொண்டிருக்கும் கடப்பாட்டை திரு பைடன் மறுஉறுதிப்படுத்துவார்.