அதிபர் தேர்தலில் புட்டின் மீண்டும் போட்டியிடலாம்

மாஸ்கோ: ரஷ்ய அதிபர் விளாடிமிர் புட்டின், அடுத்த ஆண்டு நடைபெறும் தேர்தலில் மீண்டும் போட்டியிடுவார் என எதிர்பார்க்கப்படுகிறது.

இது குறித்து சூசகமான தகவல்கள் வெளியாகியிருப்பதாக உள்ளூர் நாளேடான கொம்மர்சன்ட் குறிப்பிட்டது.

நவம்பர் மாதத்தில் ஒரு பெரிய மாநாடு நடைபெறுகிறது. அப்போது தாம் தேர்தலில் போட்டியிடுவது குறித்து புட்டின் அறிவிக்கலாம் என்று புட்டின் நிர்வாகத்துக்கு நெருக்கமான தகவல்கள் தெரிவிக்கின்றன.

அடுத்த ஆண்டு மார்ச் 24ஆம் தேதி அதிபர் தேர்தல் நடைபெறவிருக்கிறது.

1999ஆம் ஆண்டின் கடைசி நாளில் போரிஸ் யெல்ட்சின் அதிபர் பதவியை புட்டினிடம் ஒப்படைத்தார். அதன் பிறகு மிக நீண்டகாலமாக அதிபர் பொறுப்பில் புட்டின் இருந்து வருகிறார். புட்டினுக்கு அக்டோபர் 7ஆம் தேதி 71 வயது ஆகிறது.