கராக்கஸ்: உலகின் ஆக வயதான ஆடவராக 2022ஆம் ஆண்டு கின்னஸ் உலகச் சாதனைப் புத்தகத்தில் இடம்பெற்ற ஹுவான் விசெண்ட் பெரேஸ் மோரா, ஏப்ரல் 2ஆம் தேதி காலமானார்.
வெனிசுவேலாவைச் சேர்ந்த அவருக்கு வயது 114.
திரு பெரேசின் மறைவு குறித்து வெனிசுவேலா அதிபர் நிக்கோலஸ் மடுரோ எக்ஸ் தளத்தில் பதிவிட்டார்.
2022ஆம் ஆண்டு பிப்ரவரி 4ஆம் தேதி, திரு பெரேஸை கின்னஸ் உலகச் சாதனைப் புத்தகம் உலகின் ஆக வயதான ஆடவர் என்று அதிகாரபூர்வமாக அறிவித்தது. அப்போது அவருக்கு வயது 112 ஆண்டுகள் 253 நாள்கள் என்று அது குறிப்பிட்டது.
அப்போதைய நிலவரப்படி, திரு பெரேசுக்கு 11 பிள்ளைகள், 41 பேரப்பிள்ளைகள், 18 கொள்ளுப் பேரப்பிள்ளைகள், 12 எள்ளுப் பேரக்குழந்தைகள் என்று கூறப்பட்டது.
விவசாயியான அவர் 1909ஆம் ஆண்டு மே 27ஆம் தேதி, குடும்பத்தின் ஒன்பதாவது பிள்ளையாகப் பிறந்தவர். அவரது பெற்றோருக்கு மொத்தம் 10 பிள்ளைகள்.
திரு பெரேஸ் ஐந்து வயதுச் சிறுவனாக இருந்தபோதே தந்தை, சகோதரர்களுடன் இணைந்து கரும்பு, காப்பித் தோட்டத்தில் பணியாற்றத் தொடங்கியதாகத் தெரிகிறது.
விவசாயியாக இருந்தபோதும் ஷெரிஃப் பதவியை வகித்த திரு பெரேஸ் நில, குடும்பச் சர்ச்சைகளுக்குத் தீர்வுகாணும் பொறுப்பை ஏற்றிருந்தார்.