மாணவர் முரசு
இ-பேப்பர்
இசபெல்லா: பிலிப்பீன்சில் ஃபங்-வோங் தீவிரமடைந்து ஞாயிற்றுக்கிழமை அன்று (நவம்பர் 9) சூப்பர் சூறாவளியாக மாறுவதால் கிழக்கு, வடக்கு வட்டாரங்களில் வசிக்கும் 100,000 குடியிருப்பாளர்களை அந்நாட்டின் அரசாங்கம் பாதுகாப்பான இடங்களுக்கு மாற்றியுள்ளது.
பின்னேரத்தில் சூறாவளி வீசும் என எதிர்பார்க்கப்படுகிறது. இதையொட்டி புரட்டிப் போடும் பலத்த காற்றும் கடும் மழையும் பெய்யும் என முன்னுரைக்கப்பட்டுள்ளது.
பிலிப்பீன்சின் பல பெரிய இடங்களில் புயல் எச்சரிக்கை சமிக்ஞைகள் ஏற்றப்பட்டுள்ளன. தென்மேற்கில் உள்ள லுசோனில் ஆக அதிகளவுள்ள 5ஆம் எண் சமிக்ஞை வைக்கப்பட்டுள்ளது. மணிலா நகரம் மற்றும் அதனைச் சுற்றியுள்ள பகுதிகளில் எச்சரிக்கை சமிக்ஞை 3க்குக் கீழ் உள்ளது.
உள்ளூரில் உவான் என்று அழைக்கப்படும் ஃபங்-வோங் சூப்பர் சூறாவளி மணிக்கு 185 கிலோ மீட்டர் வேகத்தில் ஞாயிற்றுக் கிழமை இரவு அரோரோ மாகாணத்தில் உள்ள மத்திய லுசோனைக் கடக்கும் என எதிர்பார்க்கப்படுகிறது.
கிழக்கு விசயாஸ் உள்ளிட்ட பகுதிகளில் மின்சார விநியோகம் துண்டிக்கப்பட்டுள்ளது. பிலிப்பீன்ஸ் கடலோரக் காவல் படை பகிர்ந்துள்ள படங்களில் மக்கள் தங்கள் உடைமைகளை எடுத்துக் கொண்டு வேறு இடங்களுக்குச் செல்வதைக் காண முடிகிறது. சிலர் படகுகளில் செல்ல நீண்ட வரிசையில் காத்திருக்கின்றனர்.
ஏறக்குறைய 300 உள்ளூர், அனைத்துலக விமானச் சேவைகளும் ரத்து செய்யப்பட்டுள்ளதாக சிவில் விமானப் போக்குவரத்து நிர்வாகத்தின் தகவல்கள் தெரிவிக்கின்றன.
