புதிய அமெரிக்க கவச வாகனங்களை தைவான் காட்சிப்படுத்தியது

தைப்பே: உக்ரேன் போரிலிருந்து கற்றுக்கொண்ட பாடங்களின்படி, எதிர்காலப் போரில் ஆளில்லா வானூர்திகளுக்கு எதிராகப் பாதுகாக்கப்பட வேண்டிய ஒரு வழக்கமான ஆயுதமாக ஆய்வாளர்கள் கருதும், தனது முதல் அமெரிக்காவில் இருந்து பெறப்பட்ட ‘எம்1ஏ2டி அப்ராம்ஸ்’ கவச வாகனங்களின் ஆயுதப் பலத்தை தைவான் ராணுவம் வியாழக்கிழமை (ஜூலை 10) காட்சிப்படுத்தியது.

தைவானின் வடமேற்கில், தைவான் நீரிணைக்கு எதிரே அமைந்துள்ள சின்சு மாவட்டத்தில் உள்ள ஒரு சேறு நிறைந்த ராணுவப் பயிற்சி மைதானத்தில் நான்கு அப்ராம்ஸ் கவச வாகனங்கள் நகர்த்தப்படுவது காட்டப்பட்டது.

சீனாவுடனான மோதலில் தைவானின் மீள்திறனைச் சோதிக்கும் வகையில் வடிவமைக்கப்பட்ட தைவானின் வருடாந்தர ராணுவப் பயிற்சிகளின் இரண்டாவது நாளில், நகரும், நிலையான இலக்குகளை நோக்கி கவச வாகனங்கள் சுடுவது காணப்பட்டது.

போர் தலைக்கவசம் அணிந்திருந்த தைவான் அதிபர் லாய் சிங்-டே, கவச வாகனங்கள் சுடுவதைக் கவனித்தார்.

“ராணுவத்தின் போர் சக்தி அதிகரிக்கும் ஒவ்வொரு முறையும், தேசமும் அதன் மக்களும் கூடுதல் பாதுகாப்பு அடுக்கைப் பெறுகிறார்கள்,” என்று அவர் கூறினார்.

சீனாவின் எந்தவொரு தாக்குதல் அல்லது படையெடுப்பிற்கு எதிராகவும் தைவான் தன்னை தற்காத்துக்கொள்ள உறுதிபூண்டுள்ளது என்பதை சீனாவுக்கும் முக்கிய ஆயுத விநியோகிப்பாளரான அமெரிக்கா உள்ளிட்ட அனைத்துலகச் சமூகத்திற்கும், காண்பிப்பதே இந்த விரிவான 10 நாள் பயிற்சிகளின் நோக்கம் என்று திரு லாயின் அரசாங்கத்தில் உள்ள மூத்த ராணுவ அதிகாரிகள் தெரிவித்தனர்.