ஊழியர் பற்றாக்குறையால் அமெரிக்க விமானச் சேவையில் பாதிப்பு

வாஷிங்டன்: விமானப் போக்குவரத்துக் கட்டுப்பாடு அதிகாரிகளின் தட்டுப்பாடு காரணமாக அமெரிக்காவின் 30 முன்னணி விமான நிலையங்களில் கிட்டத்தட்ட பாதியளவு சிரமங்களை எதிர்நோக்குவதாக அமெரிக்க விமானப் போக்குவரத்து நிர்வாகத் துறை தெரிவித்துள்ளது.

அதன் காரணமாக நாடு முழுவதும் விமானப் பயணங்களில் தாமதம் ஏற்படுவதாகவும் அது கூறியுள்ளது.

அரசாங்கத்தின் முடக்கநிலை 31வது நாளை எட்டியுள்ள வேளையில் இந்தச் செய்தி வெளியாகி உள்ளது.

விமானப் போக்குவரத்துக் கடுமையாகப் பாதிக்கப்பட்டுள்ள வட்டாரங்களில் ஒன்று நியூயார்க். அங்கு 80 விழுக்காட்டு விமானப் போக்குவரத்துக் கட்டுப்பாட்டு அதிகாரிகள் வேலை செய்யவில்லை என்று விமானப் போக்குவரத்து நிர்வாகத் துறை தெரிவித்துள்ளது.

ஆஸ்டின், நியூயார்க், நேஷ்வில் போன்ற விமான நிலையங்களிலும் விமானச் சேவைகளில் தாமதம் ஏற்பட்டு வருகிறது. நியூயார்க்கில் 101 நிமிடங்களும் ஆஸ்டினில் 50 நிமிடங்களும் நேஷ்விலில் 61 நிமிடங்களும் தாமதம் ஏற்பட்டன.

விமானப் போக்குவரத்துக் கட்டுப்பாட்டு ஊழியர் பிரச்சினை விமானச் சேவைகளில் கடுமையான பாதிப்புகளை ஏற்படுத்தி வருகிறது.

அமெரிக்க விமானப் போக்குவரத்து நிர்வாகத்தின் குறைந்தபட்சம் ஒன்பது மையங்களில் ஊழியர் பிரச்சினை நிலவுவதாகத் தகவல் வெளியாகி உள்ளது. அதன் காரணமாக, ஹூஸ்டன் மற்றும் டாலஸ் வட்டாரங்களிலும் விமானச் சேவையில் தாமதம் ஏற்பட்டுள்ளது.