வட்டி விகிதத்தைக் குறைத்தது அமெரிக்க மத்திய வங்கி

வாஷிங்டன்: அமெரிக்க மத்திய வங்கி, நவம்பர் 7ஆம் தேதி, 0.25 விழுக்காடு குறைத்துள்ளது.

அதிபர் தேர்தலில் டோனல்ட் டிரம்ப் வெற்றிபெற்றிருப்பது வட்டி விகிதத்தில் தாக்கம் ஏற்படுத்தக்கூடும் என்று கருதப்பட்ட நிலையில் இந்த அறிவிப்பு வெளியாகியுள்ளது.

அதிபர் தேர்தல் முடிவடைந்து அரசியல் காட்சிகள் மாறிவரும் சூழலிலும், நாடாளுமன்ற உறுப்பினர்கள் ஒருமனதாக வட்டி விகிதக் குறைப்புக்கு ஆதரவு தெரிவித்துள்ளனர்.

அதையடுத்து கடன்களுக்கான வட்டி விகிதம் 4.5 விழுக்காடு முதல் 4.75 விழுக்காடு வரை இருக்கும் என அமெரிக்க மத்திய வங்கி கூறியது.

“சிறிது காலத்திற்கு அதிபர் தேர்தலால் எங்கள் கொள்கை முடிவுகளில் மாற்றம் ஏதும் இருக்காது,” என்று அதன் தலைவர் ஜெரோம் பவல் செய்தியாளர்களிடம் கூறினார்.

அடுத்த அதிபராகத் தேர்ந்தெடுக்கப்பட்டுள்ள திரு டிரம்ப்பின் பொருளியல் கொள்கை எப்படி இருக்கும் என்பது குறித்து நிச்சயமற்றநிலை நிலவுவதை அவர் சுட்டினார்.

தாங்கள் ஊகிக்கவில்லை என்பதை அவர் வலியுறுத்திக் கூறினார்.

அதேநேரத்தில், தமது பதவிக்கான தவணைக்காலம் முடிவடைவதற்கு முன்னரே பதவியிலிருந்து விலகும்படி புதிய அதிபர் டிரம்ப் கேட்டுக்கொண்டாலும் தாம் பதவி விலகப்போவதில்லை என்று திரு பவல் கூறினார்.

தொடர்புடைய செய்திகள்

அமெரிக்க வட்டி உயர்வு; ஆசிய சந்தைகள் சரிவு

அமெரிக்க மத்திய வங்கியின் ஆளுநர்கள் ஏழு பேரில் யாரையும் பதவிநீக்கம் செய்வதற்குச் சட்டத்தில் அனுமதி இல்லை என்பதை அவர் எடுத்துரைத்தார்.

அண்மையில் திரு டிரம்ப், அமெரிக்க மத்திய வங்கியைக் குறைகூறியிருந்தார். அடுத்து அவரது நிர்வாகத்தின்கீழ், நாடாளுமன்ற உறுப்பினர்கள் மிகக் கவனமாகச் செயல்பட வேண்டிய நிலையில் இருப்பதைத் திரு பவலின் பேச்சு சுட்டுவதாகக் கவனிப்பாளர்கள் கூறினர்.

திரு பவல் ஜனநாயகக் கட்சியினருக்குச் சாதகமாகப் பணியாற்றுவதாகத் தேர்தல் பிரசாரத்தின்போது திரு டிரம்ப் பலமுறை சாடினார்.

முன்னர் அமெரிக்க மத்திய வங்கியின் தலைவராகத் திரு பவலை நியமித்ததே திரு டிரம்ப்தான் என்பது நினைவுகூரத்தக்கது.

மத்திய வங்கி வட்டி விகிதத்தை நிர்ணயிப்பதில் அதிபர் என்ற முறையில் கருத்துரைக்க விரும்புவதாகத் திரு டிரம்ப் கூறியுள்ளார். இதுவரை அத்தகைய வழக்கம் கடைப்பிடிக்கப்படவில்லை. பணவீக்கத்தையும் வேலையின்மையையும் சமாளிக்கும் விதமாக அமெரிக்க மத்திய வங்கி சுதந்திரமாகச் செயல்படலாம் என்று அந்நாட்டு நாடாளுமன்றம் அனுமதி அளித்துள்ளது.

இதற்கிடையே, இறக்குமதிப் பொருள்களின்மேல் வரி விதிக்கப்போவதாகத் திரு டிரம்ப் தமது தேர்தல் பிரசாரத்தில் மிரட்டல் விடுத்ததைச் சுட்டிய ஆய்வாளர்கள், இதனால் தென்கிழக்காசிய நாடுகளில் மலிவான விலையில் சீனப் பொருள்கள் அதிகம் விற்பனைக்கு வரக்கூடிய அபாயம் அதிகரிக்கும் என்று எச்சரித்துள்ளனர்.

பயனாளர்களுக்கு இது நற்செய்தி என்றாலும் இந்த வட்டார ஏற்றுமதிப் பொருள்களின் போட்டித்தன்மை மிகவும் குறையும் என்றும் அதனால் பொருளியல் வளர்ச்சியும் வேலைவாய்ப்புகளும் பாதிக்கப்படும் என்றும் கருதப்படுகிறது.