வியட்னாம் அமைச்சரவை மாற்றங்கள்: கூடுதலாக இரு துணை முதல்வர்கள்

வியட்னாம் அதன் அமைச்சரவையில் மாற்றங்களை சனிக்கிழமை (அக்டோபர் 25) உறுதிசெய்துள்ளது. அதன்படி, கூடுதலாக இரண்டு துணை முதல்வர்கள், மூன்று அமைச்சர்கள் நாடாளுமன்றத்தில் இடம்பெறுவர் என்று வியட்னாமின் அரசாங்க ஊடகம் தெரிவித்துள்ளது.

புதிய மாற்றத்துக்குப் பிறகு, தற்பொழுது ஒன்பது துணை முதல்வர்கள் வியட்னாமின் அரசாங்கத்தில் பணியில் உள்ளனர்.

முன்னாள் உள்நாட்டு அமைச்சர் பாம் தி தான் டிரா, கியா லாய் மாநிலத்தின் முன்னாள் கம்யூனிஸ்ட் கட்சியின் தலைவர் ஹொ குவொக் டங் ஆகியோர் புதிய துணை முதல்வர்களில் அடங்குவர் எனவும் அரசாங்க ஊடகம் தெரிவித்தது.

வெளியுறவு, விவசாயம், உள்நாட்டு விவகாரங்கள் ஆகிய துறைகளுக்கும் அமைச்சர்கள் நியமிக்கப்பட்டுள்ளனர். வியட்னாமின் சட்டமன்றம் அக்டோபர் 20ஆம் தேதி தொடங்கி டிசம்பர் 11 வரையிலான இவ்வாண்டின் இறுதி கூட்டத்தை நடத்திவருகிறது.

அடுத்த ஆண்டு ஜனவரியில், வருங்கால திட்டங்களையும் புதிய தலைவர்களையும் நியமிக்க, வியட்னாம் கம்யூனிஸ்ட் கட்சி, ஐந்தாண்டுகளுக்கு ஒருமுறை நடக்கும் மாநாட்டை ஏற்பாடு செய்துவருகிறது. அதன் முன்னோடியாக நாடாளுமன்ற மாற்றங்கள் பார்க்கப்படுகின்றன என்று ராய்ட்டர்ஸ் செய்தி நிறுவனம் தகவல் வெளியிட்டது.