மாணவர் முரசு
இ-பேப்பர்
ஹனாய்: வியட்னாமின் நாடாளுமன்றம் அந்நாட்டில் பல மாநிலங்களை ஒன்றுடன் ஒன்று இணைக்க ஒப்புதல் வழங்கியுள்ளது.
வியாழக்கிழமை (ஜூன் 12) நாடாளுமன்றத்தில் நடந்த வாக்கெடுப்பில் 461 பேர் அரசாங்கத்திற்கு ஆதரவாக வாக்களித்தனர்.
இதனால் கிட்டத்தட்ட 80,000 அரசாங்க ஊழியர்கள் அவர்களது வேலைகளை இழக்க நேரிடும்.
தற்போது 63 மாநிலங்களாக உள்ள வியட்னாம் 34 மாநிலங்களாக மாற ஒப்புதல் வழங்கப்பட்டுள்ளது. அரசாங்கம் அதன் செலவுகளைக் குறைக்கும் வழிகளில் இதுவும் ஒன்று என்று குறிப்பிட்டுள்ளது.
கடந்த பிப்ரவரி மாதம் வியட்நாம் அரசாங்கம் அதன் அமைச்சு மற்றும் அரசாங்க அமைப்புகளின் எண்ணிக்கையை முப்பதிலிருந்து 22ஆக குறைத்தது. இதனால் கிட்டத்தட்ட 23,000 பேர் வேலை இழந்தனர்.
அண்மையில் அமெரிக்க அதிபர் டோனல்ட் டிரம்ப் நாட்டின் செலவுகளைக் குறைக்க அரசாங்க ஊழியர்கள் பலரைப் பணியிலிருந்து நீக்கினார். இது அமெரிக்காவில் சலசலப்பை ஏற்படுத்தியது. தற்போது வியட்நாமிலும் அது நடக்கத் தொடங்கியுள்ளது.
நாட்டின் வளர்ச்சியை வேகமாகவும் நிலையாகவும் நீடித்த வளர்ச்சி கொண்டதாகவும் மாற்ற இந்த மாற்றம் தேவையானது என்று வியட்னாமின் தலைவர் தோ லம் தெரிவித்தார்.
புதிய மாற்றத்திலிருந்து 11 மாநிலங்கள் மட்டும் எந்த மாற்றமும் இல்லாமல் உள்ளன. மற்றவற்றில் பல மாற்றங்கள் உள்ளன.
தொடர்புடைய செய்திகள்
புதிதாக மாற்றியமைக்கப்படும் மாநிலங்களுக்கும் நகரங்களுக்கும் ஜூன் 30ஆம் தேதி புதிய தலைவர்கள் அறிவிக்கப்படுவார்கள் என்று அரசாங்க செய்தி அறிக்கையில் தெரிவிக்கப்பட்டது.
மேலும், ஜூலை 1ஆம் தேதி முதல் அந்த மாநிலங்களில் அனைத்துவிதமான அரசாங்க நடவடிக்கைகளும் வழக்கம்போல் தொடரும் என்றும் அறிக்கையில் குறிப்பிடப்பட்டிருந்தது.
அதேபோல் தற்போது வியட்னாமில் நடைமுறையில் உள்ள மூன்று அடுக்கு நிர்வாகக் கட்டமைப்பு இரண்டு அடுக்காக மாற்றப்படும். அதற்கான வாக்கெடுப்பு சில தினங்களில் நடக்கும் என்று அறிவிக்கப்பட்டது.
தற்போது வியட்னாம் மாநிலம், மாவட்டம், சிற்றூர் எனப் பிரிக்கப்பட்டுள்ளது. இனி மாவட்டம் தொடர்பான நடவடிக்கைகள் அகற்றப்பட்டு சிற்றூர்கள் பெரிதாக்கப்படும் என்று கூறப்படுகிறது.