மாணவர் முரசு
இ-பேப்பர்
இளம் தலைமுறையினரிடையே தமிழ்மொழியில் ஆர்வத்தைத் தூண்ட இளையர்கள் ஒன்று சேர்ந்து ஏற்பாடு செய்த மின்னிலக்க விளையாட்டுப் போட்டிகள் மாணவர்கள், பெற்றோர் என பல தரப்பினரிடத்திலும் வரவேற்பைப் பெற்றது.
தமிழ் இளையர் விழாவையொட்டி ‘எடுவில்’ (Eduville) அமைப்பின் ‘மின்வழித் தமிழ்மொழி’ எனும் விளையாட்டுப் போட்டியில் உற்சாகத்துடன் கலந்துகொண்டனர் பல இளையர்கள்.
உமறுப் புலவர் தமிழ்மொழி நிலையத்தில் ‘மின்வழித் தமிழ்மொழி’ போட்டியின் இறுதிச் சுற்று செப்டம்பர் 6ஆம் தேதி நடந்தது.
ஆகஸ்ட் 30ஆம் தேதி இடம்பெற்ற தகுதிச் சுற்றில் 100க்கும் மேற்பட்ட பள்ளிகளைச் சேர்ந்த இளையர்கள் பங்கேற்றனர். அதில் சிறந்து விளங்கிய நான்கு குழுக்கள் இறுதிச் சுற்றுக்கு முன்னேறின.
தொடக்கப்பள்ளி, உயர்நிலைப்பள்ளி மாணவர்களுக்கு ‘நினைவேடு’ எனும் நினைவாற்றலைச் சோதிக்கும் போட்டி, ’சப் வே சர்ஃபர்ஸ்’ (Subway Surfers) பாணியில் அமைந்த ‘காளை டேஷ்’ என்ற போட்டி ஆகியவை நடைபெற்றன.
போட்டியைக் காண வந்திருந்த பெற்றோர், ஆசிரியர் உள்ளிட்டோருக்கும் தமிழில் தட்டச்சு செய்யும் வேகத்தைச் சோதிக்கும் ‘தட்டச்சு ஓட்டம்’ என்ற அங்கம் நடத்தப்பட்டது.
‘நினைவேடு’, ‘காளை டேஷ்’ ஆகிய போட்டிகளுக்கு இடையே நகைச்சுவையான பாணியில் விதிமுறைகள் அறிவிக்கப்பட்டது, மாணவர்களிடம் உற்சாகத்தை ஏற்படுத்தியது.
போட்டிகள் அனைத்தும் முழுக்க முழுக்க மின்னிலக்க முறையில் நடத்தப்பட்டதுடன், நடுவர்கள் இன்றி கணினி கொடுத்த மதிப்பெண்களை அடிப்படையாக வைத்து வெற்றியாளர்கள் தேர்வு செய்யப்பட்டது பலரது கவனத்தை ஈர்த்தது.
தொடர்புடைய செய்திகள்
மாணவர்கள் பங்கேற்ற போட்டிகளில் தொடக்கப்பள்ளிப் பிரிவில் பயனியர் தொடக்கப்பள்ளி மாணவர்களான சிவராசு ரித்திக்ராஜ், ரித்திகா ராணி சிவக்குமார் இருவரும் முதல் பரிசை வென்றனர்.
உயர்நிலைப் பள்ளிப் பிரிவில் சீடார் பெண்கள் உயர்நிலைப் பள்ளி மாணவிகள் உமாபதி [Ϟ]சங்கர் வீணாக்ஷினி, சரவணன் வைஷ்ணவி ஆகிய இருவரும் முதல் பரிசை வென்றனர்.
இரு குழுக்களுக்கும் தலா 300 வெள்ளி மதிப்புள்ள ‘பாப்புலர்’ கடை பற்றுச்சீட்டுகள் பரிசாக வழங்கப்பட்டன.
தமிழ்மொழிக் கற்றல் வளர்ச்சிக் குழுவின் துணைத் தலைவரும் ‘மார்டர்ன் மாண்டிசோரி’ நிறுவனத்தின் தலைவருமான முனைவர் டி சந்துரு சிறப்பு விருந்தினராகப் பங்கேற்று வெற்றியாளர்களுக்குப் பரிசுகளை வழங்கினார்.
‘கல்விக் கிராமம்’ எனப் பொருள்படும் ‘எடுவில்’ என்ற அமைப்பைத் தேசியப் பல்கலைக்கழக மாணவரான சஞ்சய் முத்துகுமரன் அமைத்துள்ளார்.
‘’பல்வேறு இந்தியக் கலாசார, பாரம்பரிய விளையாட்டுகளை உருவாக்கியிருக்கிறோம். தொடர்ந்து அவற்றைப் புதுப்பிக்கும் பணியையும் மேற்கொண்டு வருகிறோம்,’’ என்று தெரிவித்தார் ‘எடுவில்’ அமைப்பின் தலைமை நிர்வாக அதிகாரியான சஞ்சய்.