மாணவர் முரசு
இ-பேப்பர்
'ஹேப்பி ஹோம்' (Happy Home) என்ற தலைப்பிலான ஐந்து நிமிடத் தமிழ் குறும்படம், நாளை 'பிரேம் ஸ்டார்ஸ்' யூடியூப் சேனலில் வெளியிடப்படவிருக்கிறது.
கொவிட்-19 கிருமித்தொற்றுக் காலகட்டத்தில் அனைவரும் வீட்டிலேயே முடங்கிக் கிடந்தபோது பலரது மனநிலையும் பாதிக்கப்பட்டது.
குழந்தைப் பராமரிப்பு நிலையங்கள் மூடப்பட்ட நிலையில் பெற்றோர் வீட்டிலிருந்து தங்களின் வேலையைப் பார்த்துக்கொண்டே பிள்ளைகளையும் கவனித்துக்கொள்ள வேண்டிய நிலை ஏற்பட்டது.
"குடும்ப வாழ்க்கை, வேலைவாய்ப்பு, பிள்ளைகளின் கற்றல் ஆகியவற்றில் கொவிட்-19 ஏற்படுத்தக்கூடிய பாதிப்புகளை ஒரு மூன்று வயது சிறுவனின் கண்ணோட்டத்தில் புதுமையாகக் காட்டியுள்ளது இக்குறும்படம்," என்று குறும்படத்தை இயக்கிய அபிஜித்தன் ஜெயசோதி, 32, கூறினார்.
குடும்ப வாழ்க்கை, சமூக, உளவியல் தாக்கம் ஆகியவற்றைக் காட்டிலும் பொருளாதார, மருத்துவத் துறையில் ஏற்பட்ட தாக்கம் அதிகம்.
இது அதிகம் ஆராயப்படாத நிலையில், அப்பிரச்சினையை வெளிச்சம் போட்டுக் காட்டவுள்ளது இக்குறும்படம்.
குறும்படத்துக்கான புகைப்படப் பணிகள், எடிட்டிங், மின்னிலக்கப் பணிகள் ஆகியவற்றுக்கு நட்சத்திரம் பிரேம் குமார், 35, பொறுப்பேற்றிருந்தார்.
மூன்று வயதுச் சிறுவன் ஆத்யுகன் அபிஜித்தன் இக் குறும்படத்தில் நடித்துள்ளார். இவர் பல அனைத்துலக திரைப்பட விழாக்களில் சிறந்த இளம் நடிகருக்கான விருதையும் சிறப்பு அங்கீகாரத்தையும் பெற்றுள்ளார்.
'ஹேப்பி ஹோம்' குறும்படத்திற்கு இதுவரை 10 அனைத்துலகத் திரைப்பட விழாக்களில் நியமனம் கிடைத்துள்ளது.
இக்குறும்படத்தைக் காண விரும்புவோர், https://youtu.be/0CU3kjRxEAw என்ற இணைப்பை நாடலாம்.
செய்தி: கருணாநிதி துர்கா