மாணவர் முரசு
இ-பேப்பர்
படித்த படிப்பு கற்பித்த துடிப்புடன் மாறி மாறி சொல்மாரி பொழிந்தனர் சொற்கனல் 2024 விவாதக் களத்தில் அடியெடுத்துவைத்த பல்கலைக்கழக மாணவர்கள்.
சிங்கைத் தமிழ்ச் சங்கம் தனது 92வது ஆண்டு நிறைவில் ஏற்பாடுசெய்த இவ்விவாதப் போட்டியின் முன்னோட்டச் சுற்றுகள் ஆகஸ்ட் 24ஆம் தேதி நடந்தன. தமிழ் இளையர் விழாவின் ஓர் அங்கமாக, ஞாயிறு செப்டம்பர் 8ஆம் தேதி காலை உமறுப்புலவர் தமிழ்மொழி நிலையத்தில் போட்டியின் இறுதிச் சுற்று நடந்தது.
சிங்கப்பூர் நிர்வாகக் கல்விக்கழகத்தை (எஸ்ஐஎம்) வீழ்த்தி இறுதிச்சுற்றுக்குத் தகுதிபெற்றிருந்த நன்யாங் தொழில்நுட்பப் பல்கலைக்கழகம் (என்டியு), சிங்கப்பூர்த் தேசியப் பல்கலைக்கழகத்துடன் (என்யுஎஸ்) இறுதிச் சுற்றில் மோதியது. சிறப்பு விருந்தினராக வந்திருந்தார் முன்னாள் நியமன நாடாளுமன்ற உறுப்பினரும் ‘டாட்டா கன்சல்டன்சி சர்வீசஸ்’ நிறுவனத்தின் ஆசியான் பெருநிறுவன விவகாரங்கள் துறைத் தலைவருமான முகமது இர்ஷாத்.
மலேசிய திரங்கானு பல்கலைக்கழகத்திலிருந்து அனைத்துலக விண்ணைப் பிளக்கும் வானரங்கச் சொற்போர் மற்றும் அனைத்துலகத் தமிழிளையோர் மாநாட்டை ஏற்பாடுசெய்யும் நான்கு இளையர்களும் வருகையளித்து சிறப்பித்தனர்.
வாதங்கள் தொடங்குவதற்கு முன்னர் ‘இன்றைய இளையர்களுக்குத் தமிழ் தேவையா? இல்லையா?’ என்ற தலைப்பில் எஸ்ஐஎம் மாணவர் முகமது ஜாஃபிர், 24, உரையாற்றி, தான் எழுதிய கவிதையை வாசித்தும் கவர்ந்தார்.
சொல்லுக்குச் சொல் இணையான வாதம்
கல்லூரியை அடுத்து நீண்ட இடைவெளிக்குப் பிறகு தமிழ்மொழியில் விவாதித்தாலும் அதற்கு எவ்வித அறிகுறியும் இல்லாமல் மாணவர்கள் உணர்வுபூர்வமாகவும் அறிவுபூர்வமாகவும் முழங்கிய கருத்துகள், அரங்கெங்கும் ஒலித்தன.
கரவொலியை வரவழைத்த மாணவர்களின் வாதங்களை நகைச்சுவையாகச் சுருக்கி சிரிப்பொலியையும் வரவழைத்தார் அவைத் தலைவர் வடிவழகன் பிவிஎஸ்எஸ்.
“இன்றைய கல்விமுறை சிங்கப்பூர் மாணவர்களை எதிர்காலத்திற்குப் போதுமான அளவு தயாரிக்கிறது” என்பதே தயாரித்துப் பேசும் சுற்றின் தலைப்பு.
தொடர்புடைய செய்திகள்
இதை ஒட்டிப் பேசிய என்டியு, உலகத் தரவரிசைகளில் சிங்கப்பூர் உயர்ந்த நிலையில் உள்ளதையும், எதிர்காலத்திற்கேற்ப புதுப்பித்துக்கொள்ள வாழ்நாள் கல்வித் திட்டங்கள் வழங்குவதையும் சுட்டியது. பல்வழிக் கற்றல்முறைகள், சிறப்புத் தேவையுடைய மாணவர்களையும் உள்ளடக்கும் கல்வித் திட்டம், செயற்கை நுண்ணறிவு மூலம் பண்பாடு உள்ளிட்டவற்றைச் சுவாரசியமாகக் கற்பிக்கும் பாடங்கள் போன்றவற்றையும் மாணவர்கள் குறிப்பிட்டனர்.
அதற்கு எதிராக என்யுஎஸ், என்டியுசி ஆய்வின்படி இளையர்கள் பலரும் வேலையிடத்திற்குத் தயாராக இருப்பதாகக் கருதவில்லை என்றும், போட்டித்தன்மைமிக்க கல்விமுறை இளையரின் மனநலத்தைப் பாதிக்கிறது என்றும் விவாதித்தது. பள்ளிப் பாடங்களிலேயே மூழ்கியிருப்பதால் அன்றாட வாழ்வில் பயன்படுத்தக்கூடிய அனுபவக் கல்வியும் தம் படைப்பாற்றல்மீதுள்ள நம்பிக்கையும் அவர்களிடத்தில் குறைவதாக என்யுஎஸ் கூறியது.
இதையடுத்து, திடீர் தயாரிப்புச் சுற்றில் ஒவ்வொரு பேச்சாளரும் தன் சக எதிரணிப் பேச்சாளருடன் நேருக்கு நேர் மோதினர். தலைப்பு கொடுக்கப்பட்டதும் உடனே ஒரு நிமிடத்திற்கு பேசத் தொடங்கவேண்டும். எதிர்வாதம் தொடுக்க பேச்சாளர் ஒவ்வொருவருக்கும் மேலும் ஒரு நிமிடமும் வழங்கப்பட்டது.
“இன்றைய இளையர்களுக்குத் திருமணம் மீது நம்பிக்கை இல்லை”, “செல்வம் நிறைந்த நாடே மகிழ்ச்சியான நாடு”, “சிங்கப்பூர் இளையர்கள் முன்கோபக்காரர்கள்” போன்ற சுவாரசியமான தலைப்புகள் கொடுக்கப்பட்டன.
கடினமான தீர்வு
நடுவர்களின் தீர்ப்பு இல்லையேல் வெற்றியைத் தீர்மானிக்கமுடியாத அளவிற்கு ஈரணிகளும் சரிசமமாக விவாதித்தன. நடுவர்களுக்கிடையிலான விவாதத்தையடுத்து என்யுஎஸ் அணி வாகைசூடியது. வெற்றிபெற்ற அணிக்கு 1200 வெள்ளி, இரண்டாவது அணிக்கு 900 வெள்ளி வழங்கப்பட்டன.
நாவில் தவழ்ந்தோடிய தமிழுடன் என்யுஎஸ் அணியின் நான்காவது பேச்சாளர் விஷ்ணு வர்தினி சிறந்த பேச்சாளர் விருதை வென்றார்.
இடையே நடந்த பார்வையாளர் சுற்றில் ரகுநந்தன், பிரசாத், கவிஞர் மகுடேசுவரன் மாணவர் பாசறை சிங்கப்பூர் அமைப்பு உறுப்பினர் நல்லாண் ஆகியோர் வென்றனர்.
மெச்சத்தக்க இளையர்கள் முயற்சி
“இந்த இளையர்கள் தமிழிலேயே சிந்தித்து, தமிழிலேயே பேசுவதைக் காணும்போது பெருமகிழ்ச்சியடைந்தேன். அவர்கள் கருத்துக்களைக் கோவையாகக் கூறி, எதிர்வாதங்கள் கொடுத்த விதம் என்னை மிகவும் கவர்ந்தன,” என்றார் சிறப்பு விருந்தினர் முகமது இர்ஷாத்.
“முழுக்க முழுக்க இளையர்களின் ஈடுபாட்டினால் பிறந்தது இந்த சொற்கனல். கனலாய் நம் மனதில் இருக்கும் பலவற்றை ஆக்கப்பூர்வமாக சிந்தித்து சரியான மேடையில் வழங்க இந்நிகழ்ச்சி வழிவகுத்துள்ளது,” என்றார் சிங்கைத் தமிழ்ச் சங்கத் துணைத் தலைவரும் சிங்கப்பூர் JVKM குழுமத்தின் நிர்வாக இயக்குநருமான விஜி ஜெகதீஷ் பிபிஎம்.
“சுமார் மூன்று மாதங்களாகத் தயார்செய்துவந்தோம். சிங்கைத் தமிழ்ச் சங்க இளையர் பிரிவிலிருந்து அனைவரும் இன்று உதவி இந்நிகழ்ச்சியை நடத்தினோம்,” என்றார் சொற்கனல் 2024 செயற்குழுத் தலைவர் ந ல கோபிகா.