மாணவர் முரசு
இ-பேப்பர்
தமிழில் 'சிங்கம்புலி' படத்தில் ஜீவாவுக்கு ஜோடியாகவும் தொடர்ந்து 'கந்தர்வன்', 'மல்லுக்கட்டு' ஆகிய தமிழ்ப் படங்களிலும் நடித்திருந்தார் மலையாள நடிகை ஹனிரோஸ். ஆரம்பத்தில் மலையாளத்தில் சிறிய வேடங்களில் நடித்துக் கொண்டிருந்த இவருக்கு ஒரு கட்டத்தில் அவர் நடித்த படங்கள் எல்லாம் வெற்றிப் படமாக அமைய, மலையாளத்தில் முக்கியமான நடிகையானார் ஹனிரோஸ்.
திடீரென அவரது திரையுலகப் பயணத்தில் ஒரு சிறிய இடைவெளி ஏற்பட்டாலும் தற்போது அதிரடியாக மீண்டும் மறுபிரவேசம் செய்துள்ள ஹனிரோஸ். அண்மையில் வெளியான பட்டாம்பூச்சி படத்தில் சுந்தர்.சிக்கு ஜோடியாக கதாநாயகியாக நடித்திருந்தார்.
இந்நிலையில் தற்போது 'புலி முருகன்' படத்தின் இயக்குநர் வைசாக் இயக்கத்தில் மோகன்லால் நடிப்பில் வெளியாகியுள்ள 'மான்ஸ்டர்' படத்தில் கதாநாயகியாக நடித்துள்ளார் ஹனிரோஸ்.
அண்மையில் வெளியான இந்தப் படத்தில் பல நடிகைகள் ஏற்று நடிக்க தயங்கும் சவாலான ஓரினச்சேர்க்கைப் பெண் கதாபாத்திரத்தில் துணிச்சலாக நடித்துள்ளார் ஹனிரோஸ். அவர் மட்டுமல்ல தெலுங்கு நடிகையான லட்சுமி மஞ்சுவும் இதைப்போன்ற கதாபாத்திரத்தில் ஹனிரோஸுக்கு இணையாக நடித்திருந்தார். இந்நிலையில் படம் பார்த்த பலரும் ஹனிரோஸ் நடிப்பை வெகுவாகப் பாராட்டி வருகிறார்கள்.
இந்தப் படத்தில் நடித்தது குறித்து ஹனிரோஸ் கூறும்போது, "இயக்குநர் வைசாக் என் மீது நம்பிக்கை வைத்து இந்த கதாபாத்திரம் கொடுத்ததற்காக அவருக்குத்தான் என் முதல் நன்றியைத் தெரிவிக்க வேண்டும்.
"இதுவரை மோகன்லாலுடன் பல படங்களில் நடித்திருந்தாலும் இந்தப் படத்தில்தான் படம் முழுவதும் அவருடன் பயணிக்கும் விதமாக முதன்முறையாக நடித்துள்ளேன் என்பது கூடுதல் மகிழ்ச்சி. இதுபோன்ற வித்தியாசமான, நடிப்புக்கு தீனி போடுகின்ற சவாலான கதாபாத்திரங்களில் தொடர்ந்து நடிக்க ஆசைப்படுகிறேன்," என்று கூறியுள்ளார்.