குறு முன்னோட்டக் காட்சியில் மிரட்டும் சூர்யா

‘கங்குவா’ படத்தின் குறு முன்னோட்டக் காட்சியில் சூர்யாவின் அறிமுகமும் தோற்றமும் ரசிகர்களின் கவனத்தை ஈர்த்திருக்கிறது.

சூர்யா நடிப்பில் அடுத்ததாக திரையரங்குகளில் வெளியாக உள்ள திரைப்படம் ‘கங்குவா’. இதில் திஷா பதானி, பாபி தியோல், யோகி பாபு, ரெடின் கிங்ஸ்லி உட்பட பலர் நடிக்கின்றனர்.

இந்தப் படத்தின் குறு முன்னோட்டக் காட்சி அண்மையில் வெளியிடப்பட்டு ரசிகர்களின் கவனத்தை ஈர்த்துள்ளது. முன்ஜென்மம், மறுபிறவி உள்ளிட்ட அம்சங்கள் நிறைந்த கதைக்களத்தில் பிரமாண்டமான காட்சி அமைப்புகளுடன் படம் உருவாகியிருப்பதை அந்தக் காணொளி உணர்த்துகிறது.

காணொளியில் தேவிஸ்ரீ பிரசாத்தின் பின்னணி இசை தனித்து தெரிகிறது. இறுதியில் பாபி தியோலும் சூர்யாவும் கத்திக்கொண்டு ஆக்ரோஷமாக நிற்கும் ஒற்றைக் காட்சி ரசிகர்களை பெரிதும் ஈர்த்திருக்கிறது.

யு.வி கிரியேஷன்ஸ் மற்றும் ஸ்டூடியோ கிரீன் நிறுவனங்கள் இணைந்து தயாரிக்கும் இந்தப் படத்தை சிறுத்தை சிவா இயக்குகிறார். வெற்றி பழனிச்சாமி ஒளிப்பதிவு செய்கிறார். தேவிஸ்ரீ பிரசாத் இசையமைக்கிறார். 3டியில் உருவாகும் இந்தப் படம் தமிழ், தெலுங்கு, இந்தி உட்பட 10 மொழிகளில் வெளியாக இருக்கிறது. இதில் இரண்டு கதாபாத்திரங்களில் சூர்யா நடிக்க உள்ளதாகக் கூறப்படுகிறது.